Qazaxıstan parlamentində qızğın müzakirə: Azərbaycan bankı...

Qazaxıstan parlamentində qızğın müzakirə:

Vahid Təqaüd Yığım Fondunun Azərbaycan Beynəlxalq Bankında 250 milyon dollar həcmindəki vəsaiti Qazaxıstan üçün itirilməyib.

Axar.az xəbər verir ki, bunu Qazaxıstan parlamentində çıxışı zamanı Maliyyə naziri Baxıt Sultanov söyləyib. Onun sözlərinə görə, Astana yalnız faiz dərəcələrində itki ilə üzləşəcək.

Parlamentdə Qazaxıstanla Azərbaycan arasında ikiqat vergitutulmasından qaçılması ilə bağlı qanun layihəsinin müzakirəsi zamanı çıxış edən deputat Vladislav Kosarev Astananın bu vəsaitinin Azərbaycana təsir edə bilməməsi ucbatından itirildiyini bildirib. O, həmçinin, Bakı ilə maliyyə münasibətlərinə yenidən baxılmasını istəyib.

Baxıt Sultanov isə cavabında Astananın vəsaitlərinin itirilmədiyini deyib:

“İtirilmək təhdidi bankın bankrot olacağı və kreditorların əksəriyyətinin borclarının restrukturizasiyasını dəstəkləməyəcəyi halda yaranacaqdı. Hazırda bankın istiqrazları Azərbaycanın suveren istiqrazları ilə mübadilə olunub. Əvvəlki yatırımla müqayisədə fərq olacaq, amma əsas vəsaiti itirməyəcəyik. Faiz dərəcəsi 3,5% (əvvəl 8,25% idi – red.) olacaq ki, bu da suveren ölkələrin bazar qiymətlərinə yaxındır”.

Parlamentdəki müzakirəyə, həmçinin, Qazaxıstan Milli Bankının sədr müavini Alpısbay Əhmədov da qatılıb. O da maliyyə nazirinin mövqeyini müdafiə edib:

“Bizim yalnız itirilmiş mənfəətimiz var. Vahid Təqaüd Yığım Fondunun vəsaitləri saxlanılıb. Bu ölkənin reytinqi Azərbaycan Beynəlxalq Bankının reytinqindən yüksəkdir. Ona görə də risk çox azdır”.

Qeyd edək ki, Qazaxıstan 2014-cü ildə Beynəlxalq Bankın qiymətli kağızlarını əldə edib. Bank bu qiymətli kağızları 10 il müddətinə 8,25%-lə əldə edib.



Twitter Facebook Myspace Stumbleupon Technorati blogger google
345 dəfə oxundu
 



XƏBƏR LENTİ
Loading...