Səlim Müslümov özü ilə kimləri “aparacaq”?

Səlim Müslümov özü ilə kimləri “aparacaq”?

Hesablama Palatasının 2017-ci ilin yekunlarına dair açıqladığı hesabatda Əmək və Əhalinin Sosial Müdafiəsi Nazirliyində aşkara çıxan nöqsanların qeyd olunması sabiq nazir Səlim Müslümovu hədəfə gətirdi. Nəzərə alsaq ki, hesabatın əhatə etdiyi dövr Səlim Müslümovun nazir olduğu müddəti əhatə edir. Bütün nöqsanların cavabdehi də məhz sabiq nazir olmalıdır. Qeyd edək ki, "Hesablama Palatasının 2017-ci ildə fəaliyyəti haqqında” rəsmi hesabatında Azərbaycanda vəfat etmiş 181 nəfərə qanunsuz olaraq pensiya yazıldığı açıqlanıb.

Auditin başlanıldığı tarixə 181 halda pensiya alan şəxsin vəfat etdiyi tarixdən sonra hesabların bağlanılmadığı, həmin hesablara ödənişlərin davam etdirilərək 624,5 min manat, 35 şəxsin, eyni zamanda Fondun iki müxtəlif yerli orqanından əmək pensiyası aldığı və nəticədə onlara ikiqat pensiya ödənilərək, ümumilikdə 319,1 min manat məbləğində vəsait ödənildiyi məlum olub.

Ümumiyyətlə, sabiq nazir haqqında xeyli sayda ciddi ittihamlar səslənir. Bir müddət öncə Səlim Müslümovun 2 milyard manat dövlət vəsaitini mənimsədiyi haqqında iddialar sıradan xəbərlər deyil. İddialara görə, uzun illər boyu qurulmuş mexanizm əsasında yoxa çıxarılan məbləğ 2-2,5 milyard manata yaxındır. İddia olunur ki, mexanizm bir neçə ay əvvəl Fondda aparılan yoxlamalar zamanı üzə çıxarılıb. Onun detallarının dəqiqləşdirilməsi, həmçinin qeyd olunan mexanizm üzrə hesablamaların aparıldığı haqqında da informasiyalar var.

Qeyd edək ki, Hesablama Palatası yoxlamaların nəticəsini aidiyyatı üzrə Baş Prokurorluğa göndərir və aşkarlanan nöqsanların aradan qaldırılması bu prosesin gedişatı ilə bağlıdır. Digər tərəfdən, Palatanın yoxlamaları zamanı aşkarlanan nöqsanlar birbaşa cinayət işinin açılmasına dəlalət edir. Beynəlxalq təcrübədə də Hesablama Palatasının fəaliyyəti məhz bunu ehtiva edir. Dünya ölkələrində Hesablama Palatası kimi qurumların rolu büdcə xərcləmələrini yoxlayıb, nəticələri ilə hətta cinayət işinin açılması üçün təkcə parlamentə yox, hüquq-mühafizə orqanlarına verilməsindən ibarətdir. Dünya praktikasında hüquq-mühafizə orqanları Hesablama Palatasının apardığı yoxlamaların nəticəsinə görə araşdırmalara başlayır.

Hesablama Palatasının 2017-ci il üzrə hesabatında Əmək və Əhalinin Sosial Müdafiəsi Nazirliyi haqqında göstərdiyi nöqsanlar sabiq nazir Səlim Müslümova cinayət işi açılması ehtimalını gündəmə gətirdi. Ancaq məsələnin digər tərəfi Səlim Müslümovun özü ilə bərabərində kimləri “aparacaqdır”. Məlumdur ki, nazir rəhbər şəxsdir və qurumda baş verən bütün problemlərdən xəbərdardır. Əgər xəbərdar deyilsə, bunun özü də nazirin fəaliyyətinə kölgə salan məqamdır. Bu baxımdan Səlim Müslümovun nəzarətində olan nazirliyin digər şöbələrində baş verən qanunsuzluqlar da məhz nazirin və həmin şöbələrin rəhbərlərinin adına yazılır.

Məsələn, hesabatda yer alan pensiyaların verilməsi birbaşa olaraq Dövlət Sosial Müdafiə Fondunun balansındadır. Bu Fondun uzun illər keçmiş naziri Səlim Müslümovun birbaşa nəzarətində olub. Ancaq Fondun rəhbərinin də məsuliyyətdən kənarda qalmayacağı istisna olunmur.

Digər tərəfdən, məlumatlara görə hazırda nazirliyin tərkibində fəaliyyət göstərən tibbi-sosial ekspert komissiyasında (TSEK) ciddi yoxlamalar aparılır.

Qeyd edək ki, adı çəkilən qurum əlilliyin müəyyən olunması və tibbi-sosial reabilitasiya işinin təşkilini həyata keçirir. Məlumatlara görə, qurumun fəaliyyətində ciddi nöqsanlar aşkar olunub. Bildirilir ki, quruma rəhbərlik edənlər saxta əlillik dərəcəsinin verilməsində iştirak ediblər. İşin gedişatında bir çox əməkdaşın həbs olunma ehtimalı yüksəkdir. Qeyd olunur ki, əlillik dərəcəsi üçün xəstəxanalardan verilən saxta epikrizlər də (xəstəlik tarixindən çıxarış-red) aşkarlanıb. Bu da TSEK-nin qanunsuz fəaliyyətdə həkimlərlə işbirliyində olduğunu göstərir. Bu isə quruma rəhbərlik edənlərlə bərabər bir sıra həkimlərin də istintaqa cəlb olunacağı ehtimalını artırır.

Görünən odur ki, Səlim Müslümov özü ilə bərabər bir çox şəxsi aparacaq. Proseslərin nə ilə nəticələnəcəyinə isə yaxın zamanlarda aydınlıq gələcək. Bütün hallarda sabiq nazirin fəaliyyəti onun və yaxın ətrafı üçün ciddi başağrısına çevriləcəyi ehtimalı yüksəkdir.



Twitter Facebook Myspace Stumbleupon Technorati blogger google
1022 dəfə oxundu
 



XƏBƏR LENTİ
Loading...