Zelenskinin həyat yoldaşının Krımdakı mənzili satışa çıxarıldı
Bizim.Media xəbər verir ki, bu barədə rus mətbuatı yazıb.
Mənbə qeyd edir ki, sahəsi 119,5 kvadratmetr olan mənzil açıq hərrac yolu ilə satılacaq.
2019-cu ildə Reuters yazmışdı ki, 2013-cü ilin aprelində, Krım hələ Ukraynanın tərkibində olarkən, Zelenskinin arvadı Yelena ukraynalı iş adamı və Ali Radanın keçmiş deputatı Aleksandr Buryakdan Qara dəniz sahilindəki Livadiya qəsəbəsindəki “İmperator” yaşayış kompleksində mənzil alıb. Zelenskinin qərargahı satınalmanı təsdiqləyib. Daha sonra Krım Dövlət Qeydiyyat Komitəsi Zelenskayanın bu mənzilə olan hüquqlarını tanıdıqlarını bəyan edib.
Keçən aprel ayında Krımın Dövlət Şurası Rusiya Dövlət Dumasına “dost olmayan dövlətlərin” əmlakının təzminat ödəmədən müsadirə edilməsini təklif edən qanun layihəsi təqdim edib (Rusiya hakimiyyəti Ukraynanı belə tanıyıb). Prezident yanında Qanunvericiliyin Kodifikasiyası Şurası Konstitusiyaya zidd olan bu təşəbbüsü dəstəkləməyib.
Payızda Krım parlamenti “Krım Respublikasının əmlakının idarə edilməsi məsələləri haqqında” qətnaməyə dəyişiklik edərək, Rusiyaya, onun hüquqi və fiziki şəxslərinə qarşı qeyri-dost hərəkətlər edən xarici dövlətlərin əmlakının respublikanın mülkiyyəti kimi tanınmasına səs verib.
