İranın nəqliyyat və avtomobil sektorlarına dəstək verənlər cəzalandırılacaq - SANKSİYALAR
ABŞ Prezidenti Donald Tramp, İrana qarşı embarqoları pozanlara sanksiya tətbiq olunmasını təmin edəcək yeni bir fərman imzalayıb.
"Marja" xəbər verir ki, Trampın, İrana qarşı iqtisadi sanksiyaların yenidən qüvvəyə minməsinə az müddət qalmış imzaladığı yeni fərman Ağ Ev tərəfindən dərc olunub.
ABŞ-ın İran ilə imzalanan nüvə müqaviləsindən birtərəfli olaraq çıxması çərçivəsində tətbiq olunacaq sanksiyaların pozulmasının qarşısını almağa yönəlmiş fərmanda, "İranın ABŞ dolları və qiymətli metallar əldə etməsinə, enerji sektoruna, ABŞ-ın "qara siyahısı"ndakı vətəndaşlarına, nəqliyyat, liman və gəmiqayırma əməliyyatlarına dəstək verənlərə" sanksiya tətbiq edilməsi tapşırığı verilib.
Sərəncama görə, "7 Avqust 2018-ci il və sonra, İran hökumətinin ABŞ dolları və qiymətli metal satın almasına və təmin etməsinə kömək edən, sponsorluq edən, maliyyə, maddi və ya texnoloji dəstək verənlər" ABŞ-ın sanksiyalarına məruz qalacaqlar.
Bundan başqa, İranın avtomobil sektorunu maraqlandıran məhsul və xidmətləri satan, tədarük və ya transfer edənlər yenə 7 Avqust 2018-ci il tarixindən etibarən sanksiyalarla cəzalandırılacaq.
"5 Noyabr 2018-ci il və sonra İran Milli Neft Şirkəti, Naftiran Ticarət Şirkəti və İran Mərkəzi Bankına yardım edən, sponsorluq edən, maliyyə, maddi və ya texnoloji dəstək təmin edənlərə" da sanksiya tətbiq olunacaq.
Fərmanda, ABŞ Xəzinə Nazirliyinin sanksiya siyahısında yer alan şəxslərə dəstək verənlərin də 5 Noyabrdan etibarən sanksiyalarla qarşı-qarşıya qalacağı bildirilib.
Tramp, İrana qarşı sanksiyalara dair açıqlamasında, ABŞ-ın sanksiyalara tam riayət edilməsini təmin etməyə qərarlı olduğunu və İranla əlaqələrini dayandırmayanların ciddi nəticələrlə qarşı-qarşıya qalacağını vurğulayıb.
Tramp, bunları qeyd edib: "Bir çox beynəlxalq şirkətlərin, İran bazarından çıxacaqlarını açıqlamalarından məmnunam. Bəzi ölkələr də İrandan xam neft idxalını azaldacaqlarını və ya dayandıracaqlarını açıqladılar. Biz bütün millətləri, İran rejiminə qarşı addımlar atmağa dəvət edirik".
Sələfi Barak Obama tərəfindən 2015-ci ildə İngiltərə, Almaniya, Fransa, Rusiya və Çin ilə birlikdə imzalanan Əhatəli Birgə Fəaliyyət Planını, "ABŞ tarixində bağlanmış ən pis müqavilələrdən biri" kimi səciyyələndirən Traump, ölkəsini müqavilədən 8 Mayda çıxdığını bəyan etmişdi.
Avropa Birliyi, Fransa, İngiltərə və Almaniyadan verilən birgə açıqlamada İrana qarşı sanksiyalara dair olaraq, İranla ticarət aparan avropalı şirkətləri qorumağa qərarlı olduqları bildirilib.
Qeyd edək ki, Azərbaycan və İran nəqliyyat, avtomobil, əczaçılıq və s. sahələrdə birgə layihələr icra edirlər.
