Ermənistanda iqtisadi sıçrayış: nə baş verir?
GUNDEMINFO.AZ xəbər verir ki, bu barədə iqtisadçı ekspert, millət vəkili Vüqar Bayramov qeyd edib.
O bildirib ki, Ermənistan bir sıra Rusiya məhsullarını ixrac edərək sanksiyalardan yayınmağa və daha çox gəlir əldə etməyə nail olub:
“Aylar üzrə müqayisə göstərir ki, artımın əhəmiyyətli hissəsi Rusiya-Ukrayna müharibəsi başladıqdan sonrakı dövrə təsadüf edib. Bu isə artım səbəblərinin re-eksport ilə bağlı olduğunu bir daha təsdiq edir.
Luys Fondunun hesablamalarına görə, Ermənistan ixracatının ən azı 24.8 faizi (1.3 milyard dollar) re-eksportdur və bunsuz həmin ölkənin ixracatı indikindən 2 dəfə az artardı. Mənzərə aydındır: re-eksport və sanksiyalardan yayınmaq. Təəssüf ki, bir sıra aparıcı ölkələr bu reallığı da görmək istəmirlər”.
Qeyd edək ki, Ermənistanda bu il adambaşına düşən ÜDM-nin kəskin artdığı və Azərbaycanı qabaqlayacağı gözlənilir. “Galt & Taggart” investisiya şirkətinin hesablamalarına görə, ilin sonuna qədər Gürcüstanda adambaşına düşən ÜDM 8108 dollar, Ermənistanda 7885 dollar, Azərbaycanda isə 7530 dollar təşkil edəcək.
