Kürün səviyyəsi kritik həddə azalıb
Çayın aşağı axınında, xüsusi ilə Salyan rayonu ərazisindən keçən hissəsində vəziyyət xüsusilə ürəkaçan deyil.
BAKU TV xəbər verir ki, demək olar hər gün çayın suyunda azalmalar müşahidə olunur. Mütəxəssislər bunu yağıntıların az düşməsi ilə yanaşı, digər amillərin təsiri ilə də əlaqaləndirirlər. Belə ki, artıq Araz çayı da Kürə az su ilə qovuşur. Tikilən su anbarları Arazın da suyunu əhəmiyyətli dərəcədə azaldıb.
Ekoloq Elman Hacıyev deyir ki, son 30-40 ildə Kürdə belə bir vəziyyət müşahidə olunmayıb. Çayda suyun günbəgün azalması və onun indiki durumu yerli sakinləri də narahat etməyə başlayıb. Çünki hazırda kənd təsərrüfatında işlərin qızğın çağıdır. Əkin tarlalarını və həyətyanı sahələri suvarmaq üçün suya olan təlabat birə-beş artıb. Mütəxəssislər hesab edir ki, yaxın gələcəkdə qabaqlayıcı tədbirlər görülməzsə vəziyyət kritik həddə çata bilər.
