Türkiyədə koronavirusa yoluxma şübhəsi ilə 12 nəfər xəstəxanaya yerləşdirilib
Türkiyənin Kappadokiya bölgəsində səfərdə olan 10 çinli turist və 2 Türkiyə vətəndaşı koronavirusa yoluxma şübhəsi ilə xəstəxanaya yerləşdirilib.
“Report” RİA “Novosti”yə istinadən xəbər verir ki, bu barədə Aksaray valisi Əli Mantı mətbuat konfransında bildirib.
"Xəstəliyin simptomları turistlərdən birində ortaya çıxıb, həkimlər onunla təmasda olan daha 9 nəfəri, həmçinin bələdçi və avtobus sürücüsünü ehtiyat tədbiri olaraq nəzarətə götürüblər”, - o deyib.
Şübhəlilərdən götürülən analizlər ölkənin Səhiyyə Nazirliyinə göndərilib. Nəticələr əldə olunana qədər turistlər yerli xəstəxananın xüsusi yoluxucu xəstəliklər şöbəsində olacaq.
Xatırladaq ki, Çinin Dövlət Səhiyyə Komitəsinin son məlumatına görə, yeni növ koronavirusa yoluxanların ümumi sayı 4515 nəfərə çatıb, onlardan 106 nəfəri ölüb.
Qeyd edək ki, Çinin materik hissəsindən kənarda Honkonq, Makao, Tayvan, Tayland, Yaponiya, Cənubi Koreya, ABŞ, Kanada, Vyetnam, Sinqapur, Nepal, Fransa, Avstraliya, Malayziya və Almaniyada yoluxma halları qeydə alınıb.
