“Qarabağ” sektorun adını “Şuşa VIP” qoyub, biletləri 500 manata qaldırdı – FOTO
Yeniavaz.com xəbər verir ki, Tofiq Bəhramov adına Respublika Stadionunda keçiriləcək oyunda VIP sektorlarda biletlərin qiyməti 500 manata qədər yüksəlib.
Qeyd edək ki, bu ilin avqustun 27-də Tofiq Bəhramov adına Respublika Stadionunda keçirilən “Qarabağ” – “Ferensvaroş” oyununda VIP sektorda biletlər 50–150 manat arasında dəyişib.
Məsələn, həmin oyunda “Media” sektoruna bitişik VIP sektorda biletin qiyməti 150 manat olub. “Qarabağ” – “Kopenhagen” oyununda isə həmin sektorun adı dəyişdirilərək “Şuşa VIP” qoyulub və biletin qiyməti bir nəfər üçün 500 manata qaldırılıb.
Bundan başqa, əvvəlki oyunda 29, 30, 37 və 38-ci sektorlarda bilet qiyməti 50 manat olub. “Qarabağ” – “Kopenhagen” matçı üçün həmin yerlərdə qiymət 4 dəfə artırılaraq 200 manata çatdırılıb. Sektorların adları da dəyişdirilib: 29-cu sektor “VIP Qubadlı”, 30-cu sektor “VIP Zəngilan”, 37-ci sektor “VIP Laçın”, 38-ci sektor isə “VIP Kəlbəcər” adlandırılıb.
Bunlardan əlavə, bəzi sektorlar “VIP Füzuli”, “VIP Cəbrayıl”, “VIP Ağdam”, “VIP Xankəndi” və “VIP Xocalı” adlandırılıb və bu sektorlarda da qiymətlər təxminən 4 dəfə artırılaraq 250–500 manat aralığında müəyyən edilib.
