Siyəzəndə reyd: 20-dən çox sürücü cəzalandırıldı - VİDEO
Siyəzəndə yol hərəkəti qaydalarını pozan 20-dək sürücü inzibati qaydada cəzalandırılıb.
RTV (Region TV) xəbər verir ki, həftəsonu Siyəzən Rayon Polis Şöbəsinin dövlət yol polisi bölməsinin əməkdaşları şəhərin Heydər Əliyev prospektində reyd keçirib. Reyd zamanı yol hərəkəti qaydalarını pozan 20-ə yaxın sürücü inzibati qaydada cəzalandırılıb.
Reyd zamanı sürət həddini aşan və təhlükəsizlik kəmərindən istifadə etməyən sürücülərə daha çox rast gəlinib. İki sürücünün isə avtomobili sərxoş halda idarə etdiyi müəyyənləşib. Bununla yanaşı reyd zamanı avtomobili sürücülük hüququ olmadan idarə edən iki nəfər də aşkarlanaraq barələrində inzibati qaydada protokollar tərtib edilib.
Siyəzən Rayon Polis Şöbəsinin dövlət yol polisi bölməsinin rəisi Əliağa Əsgərbəyli bildirib ki, bu kimi reydlərin keçirilməsində əsas məqsəd avtomobilləri sərxoş vəziyyətdə idarə edən və digər qaydaları pozan sürücüləri aşkara çıxararaq, onların yarada biləcəyi yol nəqliyyat hadisələrinin qarşısını vaxtında almaqdan ibarətdir.
