“Qərargahın icazəsi olsa da, rəis müavini bazarı bağlatdırdı” - Daxili İşlər Nazirliyi açıqlama yaydı

“Qərargahın icazəsi olsa da, rəis müavini bazarı bağlatdırdı” -
Ağsu bazarının fəaliyyətini dayandıran polis mayoru Vüsal Əliyev barəsində 94 icarədar daxili işlər naziri Vilayət Eyvazov və Baş prokuror Kamran Əliyevə şikayət edib. Şikayətdən sonra müraciətə imza atan şəxslərin saxlanıldığı bildirilir.

“SVO” MMC-nin təsisçisi, Ağsu rayonunda yerləşən bazarın sahibi Sabir Mustafayev “Qafqazinfo”ya müraciət edərək bildirib ki, bazarda yalnız ərzaq və kənd təsərrüfatı məhsulları satılır, digər mağazalar bağlıdır: “Dekabrın 29-da Ağsu Rayon Polis Şöbəsinin rəis müavini, polis mayoru Vüsal Əliyev gəlib polis əməkdaşları ilə bazarın fəaliyyətini dayandırdı. Ona dedik ki, Operativ Qərargahla danışmışıq, bizim fəaliyyətimizə icazə var. O da dedi ki, Qərargaha deyin Vüsal müəllim deyir ki, bağla.

Sonra yenidən Daxili İşlər Nazirliyinin karantinlə bağlı yaradılmış 012 590 80 20 qaynar xətti ilə əlaqə saxlayıb məlumat verdik. Təxminən 10 dəqiqə sonra bazardakı polislərə əmr gəldi ki, bazardan çıxın, camaatla işiniz olmasın.

Vüsal Əliyevin bu hərəkətlərindən bazardakı 94 icarədar Baş Prokuror Kamran Əliyev və daxili işlər naziri Vilayət Eyvazova müraciət edib.

Dünəndən başlayaraq həmin müraciətə imza atanları bir-bir polis şöbəsinə aparıb hansısa yollarla şikayətlərindən imtina etdirirlər. Ərizəni yazan Babayev Fariz Böyükağa oğlu imtina etmədiyi üçün döyülüb və kameraya salınıb”.

Daxili İşlər Nazirliyi Ağsu rayonunda yerləşən bazarın fəaliyyətinin polis şöbəsinin rəis müavini, mayor Vüsal Əliyev tərəfindən qadağan edilməsi və bununla bağlı nazirliyə müraciət edən şəxslərin təzyiqlərə məruz qalması haqda məlumata münasibət bildirib.

DİN-in Mətbuat Xidmətinin Şəki regional qrupundan “Qafqazinfo”ya bildirilib ki, Nazirlər Kabinetinin müvafiq qərarı ilə 2020-ci il dekabrın 14-dən 2021-ci ilin yanvar ayının 18-dək respublikada elan edilmiş sərtləşdirilmiş xüsusi karantin rejimi ilə əlaqədar Ağsuda da Rayon Polis Şöbəsinin əməkdaşları tərəfindən vətəndaşların sosial izolyasiya qaydalarına riayət etmələri məqsədilə mütəmadi olaraq tədbirlər keçirilib:

"Dekabr ayında rayonda fəaliyyət göstərən bazarda keçirilən reydlər zamanı karantin qaydalarının pozulması hallarına rast gəlinib. Belə ki, ərzaq və kənd təsərrüfatı satışı ilə məşğul olan şəxslərin və müştərilərin sosial məsafə gözləmədiyi, tibbi maskadan tələb olunan normalara uyğun şəkildə istifadə etməməsi halları aşkarlanıb. Həmçinin, kafe, restoranlarda müştərilərə yerində xidmət dayandırılmasına baxmayaraq bazardakı kafedə ayrı-ayrı vaxtlarda iki dəfə karantin qaydalarının pozulması halları aşkarlanıb, polislər tərəfindən obyekti işlədən şəxs və orada olan müştərilər barəsində qanunvericiliyə uyğun tədbirlər görülüb.

Bazarın sahibi Sabir Mustafayevin təşəbbüsü ilə orada çalışan bir qrup icarədarın imzası ilə Baş Prokurorluğa və Daxili İşlər Nazirliyinə guya dekabr ayında həmin ticarət obyektinin fəaliyyətinin Rayon Polis Şöbəsinin əməkdaşları tərəfindən tamamilə dayandırılmasının iddia olunduğu müraciət ünvanlanıb. Müraciətlə əlaqədar həmin icarədarlar məsələnin araşdırılması məqsədilə Polis Şöbəsinə dəvət olunublar.

Araşdırmalar zamanı onların əksəriyyəti müraciətin mətnindən xəbərsiz olduqlarını, ancaq ad, soyadlarını yazaraq imzaladıqlarını bildiriblər.

Eləcə də sərtləşdirilmiş karantin rejimi müddətində ərzaq və kənd təsərrüfatı satışı ilə məşğul olan yerlərin bağlanması ilə əlaqədar yazılanların həqiqəti əks etdirmədiyini bildiriblər.

Fariz Babayevin şikayətindən imtina etmədiyi üçün Polis Şöbəsində döyülməsi barədə səsləndirilən fikirlər isə qərəzlidir. Belə ki, F.Babayev polisin qanuni tələbinə məhəl qoymadığına və xırda xuliqanlıq hərəkətlərinə yol verdiyi üçün barəsində toplanmış material məhkəməyə göndərilib və o, məhkəmənin qərarı ilə cərimə olunub".

Xatırladaq ki, “SVO” MMC-nin təsisçisi, Ağsu rayonunda yerləşən bazarın sahibi Sabir Mustafayev “Qafqazinfo”ya müraciət edərək bildirmişdi ki, Ağsu bazarının fəaliyyətini dayandıran polis mayoru Vüsal Əliyev barəsində 94 icarədar daxili işlər naziri Vilayət Eyvazov və Baş prokuror Kamran Əliyevə şikayət edib. Onun iddiasına görə, şikayətdən sonra müraciətə imza atan şəxslər saxlanılmışdı.

Twitter Facebook Myspace Stumbleupon Technorati blogger google
80 dəfə oxundu
 



XƏBƏR LENTİ
Loading...