Bayrağımızla bağlı təklifə xalq artistlərindən - Reaksiya

Bayrağımızla bağlı təklifə xalq artistlərindən -
Bakı Şəhər Gənclər və İdman Baş İdarəsinin rəisi Raqif Abbasov 9 noyabr – Dövlət Bayrağı Günü münasibətilə cəmiyyətə çağırış edib. O, hər kəsi inzibati binalardan, evlərin önündən, eyvanlardan, nəqliyyat vasitələrindən üçrəngli bayrağımızı asmağa çağırıb.

Kult.az tanınmış sənət nümayəndələrinin bu çağırışla bağlı fikirlərini öyrənib.

Xalq artisti Flora Kərimova: Çox gözəl çağırışdır və mən bunu dəstəkləyirəm. Özüm də mütləq bu çağırışa qoşulacağam. Bayrağımız hər birimizin evindən asılmalıdır. Çünki bayraq bizim namusumuz və azadlığımızdır.

Xalq artisti Mübariz Tağıyev: Mən artıq qoşulmuşam və bu təşəbbüsü yüksək qiymətləndirirəm. Mən də hər kəsi bu çağırışa qoşulmağa dəvət edirəm.

Xalq artisti Brilyant Dadaşova: Mən hazırda Azərbaycanda deyiləm, Bakıda olsaydım, məmnuniyyətlə bu çağırışa qoşulardım. Amma bizdə illərdir bağ evində bayrağımız asılıb. Düşünürəm ki, bayrağımız təkcə Bayraq Günündə deyil, hər zaman eyvanımızda dalğalanmalıdır.

Xalq artisti Mənsum İbrahimov: Mən bu çağırışı eşidəndə çox sevindim. Əlbəttə ki, sevə-sevə bu çağırışa qoşulacağam. Belə çağırışlar Türkiyədə daha çox edilir və bir çox tanınan simalar çağırışlara qoşulur. İndi ölkəmizdə də belə dəyərli çağırışların olduğunu görmək çox gözəldir. Mən inanıram ki, bizim də tanınan simalar bu çağırışa qoşulacaq və bu, kütləvi hal alacaq. Fürsətdən istifadə edib, bütün sənət dostlarımı, sənətkarlarımızı bu çağırışa qoşulmağa dəvət edirəm. Çünki bu, çox qürurverici addımdır.

Xalq artisti Alim Qasımov: Çox gözəl təşəbbüsdür, mütləq qoşulmaq lazımdır. Evdə uşaqlara tapşıracağam ki, bayrağımızı evin eyvanından assınlar.

Əməkdar artist Lalə Məmmədova: Gözəl çağırışdır. Mən istəyərəm ki, bayrağımız hər zaman binaları öz gözəlliyi ilə bəzəsin. Həmçinin, düşünürəm ki, bu, bizim gənclərimizdə vətənpərvərlik hisslərinin artmasına səbəb olacaq. Bu mənada bu təşəbbüsü dəstəkləyirəm.

Müğənni Nura Suri: Düşünürəm ki, vətənini, millətini və bayrağını sevən hər kəsin evində Azərbaycan bayrağı olmalıdır. Bu baxımdan Raqif Abbasovun təşəbbüsü təqdirə layiqdir. Amma tək bayram günlərində deyil, digər günlərdə də bayrağımız evlərimizin eyvanında dalğalanmalıdır. Çünki bu, vətənə və bayrağa olan sevginin göstəricisidir.

Twitter Facebook Myspace Stumbleupon Technorati blogger google
56 dəfə oxundu
 



XƏBƏR LENTİ
Loading...