QHT-lər üçün müsabiqə niyə elan olunmur? - Nazir iradlara cavab verdi
Maliyyə naziri Samir Şərifov bu il Qeyri-Hökumət Təşkilatlarına Dövlət Dəstəyi Agentliyinin QHT-lər üçün qrant müsabiqəsi elan etməməsinin səbəbinin Maliyyə Nazirliyi və Nazirlər Kabinetindən qaynaqlandığı barədəki iddialara münasibət bildirib.
Modern.az-ın məlumatına görə, Maliyyə naziri APA-ya deyib ki, problemin Maliyyə Nazirliyi və Nazirlər Kabinetindən qaynaqlanması barədə deyilənlər əsassızdır:
“Maliyyə Nazirliyi və Nazirlər Kabinetinin nə marağı var? Sadəcə, Agentlik yeni yaradıldığına görə müvafiq idarəetmə strukturlarının formalaşmasında müəyyən ləngimələr var. Proses başa çatan kimi bu işlər də görüləcək. Bildiyim qədər, Agentlikdə qrantların ayrılmasına Agentliyin Müşahidə Şurası tərəfindən baxılır. Həmin Şuranın tərkibi dəyişib, ləngimələr də bununla bağlıdır. Yəni problem onlarla bağlıdır. Vəsait var, bu vəsait də həmin quruma ayrılıb, buyursunlar, müvafiq qərar verib, vəsaitlərindən istifadə etsinlər”.
Qeyd edək ki, ölkə Prezidentinin 19 aprel 2021-ci il tarixli fərmanı ilə Qeyri-Hökumət Təşkilatlarına Dövlət Dəstəyi Şurasının əsasında “Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi” publik hüquqi şəxs yaradılıb.
Ancaq Agentlik ötən dövr ərzində QHT-lərin layihələrinin maliyyələşdirilməsi üçün qrant müsabiqəsi elan etməyib.
