Mübariz Qurbanlının oğlu bu vəzifədən getdi
Yeniavaz.com xəbər verir ki, daha əvvəl “Phoenix Group” MMC-yə Dini Qurumlarla İş üzrə Dövlət Komitəsinin sədri Mübariz Qurbanlının böyük oğlu Orxan Qurbanlı rəhbərlik edib.
Hazıda isə şirkətə Mehdiyev Asim Müşfiq oğlu rəhbərlik edir.
Qeyd edək ki, “Phoenix Group” MMC ötən il ləğv olunduğunu elan edib.
Hüquqi ünvanı Bakı şəhəri, Yasamal rayonu, Zahid Xəlilov küçəsi, ev 11A, mənzil 12 ünvanında yerləşən “Phoenix Group” MMC 8 il əvvəl – 25.12.2014-ci il tarixində dövlət qeydiyyatına alınıb. MMC-nin nizamnamə kapitalı 10 manat təşkil edir.
"Phoenix Group” MMC-nin adı mətbuatda mübahisəli tender əməliyyatında hallanıb. Belə ki, 2014-cü ildə təsis olunan və Orxan Qurbanlının rəhbərlik etdiyi "Phoenix Group” MMC 2015-ci ildə atası Mübariz Qurbanlının rəhbərlik etdiyi Komitə tərəfindən keçirlən ümumilikdə 153 min manatlıq tender müsabiqəsinin qalibi olub.
Orxan Qurbanlının qanuni təmsilçi olduğu daha bir şirkət 29.02.2016-cı ildə eyni ünvanda – Yasamal rayonu, Zahid Xəlilov küçəsi, ev 11A, mənzil 12-də dövlət qeydiyyatına alınıb. Mübariz Qurbanlının böyük oğlu Orxan Qurbanlı 29.06.2015-ci il tarixində Nəsimi rayonu Nizami küçəsi, ev 203B-də "Cyclee” MMC adlı daha bir şirkət qeydiyyatdan keçirib.
Mübariz Qurbanlının kiçik oğlu Mustafa Qurbanlı isə 21.04.2014-cü ildə Nəsimi rayonu 28 May, ev 58, m. 14-də "Studio 5” MMC, 27.08.2020-ci ildə isə Nərimanov rayonu, Əbdüləzəl Dəmirçizadə, ev 31 ünvanında "Celeste” MMC adlı şirkəti qeydiyyatdan keçirib.
Onu da qeyd edək ki, SOCAR-da vitse-prezidentlərdən birinin müşaviri vəzifəsində çalışan Mustafa Qurbanlı bir həftə əvvəl – may ayının 3-də nişanlandığını açıqlayıb.
