Trampın müşaviri Cənubi Qafqaza niyə gəlir? - İran versiyası
ABŞ prezidenti Donald Trampın milli təhlükəsizlik üzrə müşaviri Con Boltonun Bakı da daxil olmaqla, Moskva, Yerevan və Tiflisə səfəri ilə bağlı maraqlı iddia ortaya atılıb. Belə ki, Bolton Cənubi Qafqaz ölkələri liderlərini İranı dəstəkləməkdən imtina etmək üçün inandırmağa çalışacaq.
“Qafqazinfo” xəbər verir ki, bu barədə “Dailystorm”a Rusiyanın ABŞ-da yerləşən diplomatik missiyasındakı mənbə məlumat verib.
Mənbənin sözlərinə görə, Boltonun Qafqaz turuna çıxmasının əsas səbəblərindən biri ABŞ-ın İrana qarşı tətbiq etdiyi sanksiyalarla əlaqəlidir.
Xatırladaq ki, Vaşinqton 2018-ci ildə Tehranın bəzi qərb ölkələri, o cümlədən Birləşmiş Ştatlarla imzaladığı nüvə sazişindən imtina edib. Mənbə bildirir ki, indi Bolton Azərbaycan, Gürcüstan və Ermənistana səfər edərək həmin ölkələri İranla əməkdaşlıq etməməyə və ondan neft və qaz almamağa inandırmağa çalışacaq.
Mənbə bunun Yerevan üçün o qədər də asan məsələ olmayacağını deyir. Çünki məhz İranın hesabına Ermənistan enerji məsələsində Rusiyanın tam asılılığından çıxmağı planlaşdırır. Tehran Ermənistanın azad iqtisadi zonalarında gündəlik gücü 200 min barrel olan neft emalı zavodu tikmək istəyir. Bu barədə ötən gün İran parlamentinin planlaşdırma və büdcə üzrə komissiyasının üzvü Hadi Qavami açıqlama verib. Bu yolla da, İslam Respublikası ABŞ sanksiyalarından yan keçməyə hazırlaşır.
