Tahir Kərimov vəzifədən niyə çıxarıldı? – VİDEO
Bu gün Prezident İlham Əliyevin sərəncamı ilə Salyan Rayonu İcra Hakimiyyətinin başçısı Tahir Kərimovun vəzifəsindən azad olunması bir müddət öncə baş verən hadisəni bir daha gündəmə gətirib.
Axar.az xatırladır ki, ötən ilin avqustunda Salyan rayonunun icra başçısı Tahir Kərimovun məktəblilərin tutduğu qızılgüllərin altından keçərkən çəkilmiş fotoları yayılmışdı. Həmin fotolar 2014-cü ildə keçirilən Gül bayramında çəkilsə də, sosial şəbəkələrdə yalnız bir müddət öncə geniş müzakirə olunmuş, icra başçısının qeyri-təvazökarlığı qınanmışdı.
Prezidentin icra başçıları ilə bağlı ötəngünkü sərəncamını şərh edən PA rəhbərinin müavini, ərazi idarəetmə orqanları ilə iş şöbəsinin müdiri Zeynal Nağdəliyev də bildirdi ki, Prezident İlham Əliyev son müşavirədə yerli icra hakimiyyəti orqanlarının rəhbərləri qarşısında mühüm tələblər qoyub və qeyd edib ki, onlar insanlara xidmət göstərməli, əhalinin problemlərini həll etməli, qayğıları ilə yaşamalıdırlar, dövlət məmurları və onların ailə üzvləri özlərini təvazökar aparmalı, xalqla birlikdə olmalıdırlar və məhz bu amillərə görə onların fəaliyyətlərinə qiymət veriləcəkdir.
Z.Nağdəliyev vurğulayıb ki, vəzifədən azad edilən başçılar amiranəlik, təkəbbürlük, qərəzçilik, tənqidə qarşı dözümsüzlük nümayiş etdiriblər və nəticədə rayonun problemlərindən uzaq düşüb, sakinlərin haqlı tələblərinə məhəl qoymayıb, əhali arasında nüfuzdan düşüblər.
