YAP-ın yeni tikilən binasından oğurluq edildi FOTOLAR
Yeni Azərbaycan Partiyasının (YAP) Yasamal rayonunda tikilməkdə olan yeni binasında oğurluq hadisəsi baş verib. Məlumata görə, rayonun Seyfəddin Dağlı küçəsində YAP üçün tikilməkdə olan yeni inzibati binadan dəzgahlar oğurlanıb. Tikintisi yekunlaşmaqda olan binanın birinci mərtəbəsindən dəyəri 2 min manatdan çox olan dəzgahlar bir neçə gün əvvəl gecə saatlarında oğurlanıb. Nəzarətçinin diqqətsizliyindən istifadə edən şəxs dəzgahları bir neçə dəqiqə ərzində aparmağa nail olub.
Yasamal Rayon Polis İdarəsinin 26-cı bölməsindən faktı musavat.com-a təsdiqləyiblər.
Məlumata görə, artıq oğurluq edən şəxs saxlanılıb. Bakı Şəhər Baş Polis İdarəsinin Cinayət Axtarış İdarəsi, Təhlükəsiz Şəhər Xidməti və Yasamal Rayon Polis İdarəsi 26-cı polis bölməsi əməkdaşlarının birgə keçirdikləri əməliyyat-axtarış tədbirləri zamanı oğurluq edən şəxsin Bakı şəhər sakini, əvvəllər məhkum olunmuş 1983-cü il təvəllüdlü Pərviz Əliyev olduğu müəyyənləşdirilib. P.Əliyev artıq saxlanılıb.
