Gürcüstanın 58 vətəndaşı Bakı vasitəsilə vətənə qayıdıb
ABŞ və Böyük Britaniyadan 58 Gürcüstan vətəndaşı beş mərhələdə Heydər Əliyev Beynəlxalq Hava Limanı vasitəsilə vətənə dönüb.
“Report”un yerli bürosu xəbər verir ki, bu barədə Gürcüstanın Xarici İşlər Nazirliyindən bildirilib.
Qeyd olunub ki, Gürcüstanın Azərbaycandakı səfirliyi martın 4-dən ölkə vətəndaşlarının vətənə qayıtması istiqamətində aktiv fəaliyyətə başlayıb. İrandan 41 Gürcüstan vətəndaşının Azərbaycan ərazisi ilə vətənə çatdırılması təmin olunub.
Səfirlik həmçinin 100-ə yaxın Gürcüstan vətəndaşının ölkəyə qayıtmasına dəstək göstərib və bu proses davam etdirilir.
Diplomatik nümayəndəlik 168 ailəni ərzaq və ilkin tələbat malları, 70 ailəni isə tibbi yardım və medikament ilə təmin edib. Qax, Balakən və Zaqatala rayonlarına qida məhsulları və Gürcüstan istehsalı olan sanitar-gigyenik vasitələr təqdim olunub.
Gürcüstan səfirliyi 24 saat rejimdə zəngləri qəbul edir və gündəlik əsasda ölkə vətəndaşlarına hüquqi və texniki dəstək, həmçinin miqrasiya və gömrük məsələləri üzrə kömək göstərir.
