Ağalarov pensiyaların və maaşların azlığından dəhşətə gəldi
Azərbaycan əsilli rusiyalı milyarder, "Krokus Qrup" şirkətinin sahibi Araz Ağalarov Rusiyada maaşların və pensiyaların azlığından dəhşətə gəlib.
Axar.az Virtualaz.org-a istinadla xəbər verir ki, oliqarx "Forbes2ə müsahibəsində bu haqda danışıb. Onun sözlərinə görə, rusiyalıların gəlirləri o qədər aşağıdır ki, belə vəziyyətdə ÜDM-in əhəmiyyətli artımına nail olmaq mümkün deyil. Çünki istehsal olunan malları satmağa istehlakçı yoxdur.
"Bu gün ölkədə orta aylıq pensiya 200 dollar civarındadır, bəzilərində hətta daha aşağıdır, orta aylıq əmək haqqı da aşağıdır”, - Ağalarov Rusiya iqtisadiyyatını və biznesini 2020-ci ildə nələrin gözlədiyi haqda suala cavabında bildirib.
Milyarder Rusiyada vergi inzibatçılığının yaxşı işlədiyini bildirib, deyib ki, vergi yığımı artır, amma vergilər özü kifayət qədər yüksəkdir. Onun sözlərinə görə, əgər əvvəllər vergilərin artmasını vergi ödənişlərindən qismən yayınmaqla kompensasiya etmək mümkün olurdusa, indi bu, "demək olar, mümkün deyil".
Ağalarovun fikrincə, bu il hamı başa düşəcək ki, indiki vergi səviyyəsini saxlamaq mümkün deyil və nəsə etmək lazımdır. Və buna nə qədər tez diqqət yetirsələr, o qədər yaxşı olardı.
