Məmur İntiqam Məmmədovun “topdağıtmaz” SƏRVƏTİ
Xeyr, bu hansısa avtomobil qalareyası deyil, nə də lüks avtomobil markalarının sərgisi. Bu, İntiqam Məmmədovun oğlu Elgiz Əhmədlinin avtomobil kolleksiyasıdır və qiymətlərini hesabladıqda ortaya milyonlarla manatlıq sərvət çıxır. Bu sətirləri oxuyan hörmətli oxucu haqlı olaraq sual edəcək:
İntiqam Məmmədov kimdir, bu ölkə, bu xalq üçün hansı xidmətləri olub? Bu qədər sərvəti necə qazanıb?
Xeyr, İntiqam Məmmədov nə onu məşhur edəcək xidmətə sahibdir, nə də biznesmen deyil. Bu şəxs məmurdur. Əvvəllər Dövlət Miqrasiya Xidmətinin Bakı Şəhər Regional Miqrasiya İdarəsinin rəisi olub. 2018-ci ildən isə Bakı Şəhər Ticarət və Xidmət Departamentinin direktoru vəzifəsini daşıyır. Oğlu Elgiz Əhmədlinin hansı işə məşğul olduğu məlum deyil, sosial şəbəkələrdə yayılan avtomobil kolleksiyası ilə məşhurlaşıb. Direktorun oğlunun idarə etdiyi avtomobillərin nömrəsinin 10 EX 002 və 99 TZ 555 olduğu deyilir. Necə deyərlər, belə kolleksiyaya belə nömrələr yaraşır.
Sual yaranır: məmur olan İntiqam Məmmədov bu sərvəti necə toplayıb?
Məlumatlara görə, İntiqam Məmmədov Dövlət Miqrasiya Xidmətinin keçmiş rəisi Firudin Nəbiyevlə kirvədir. Onu miqrasiya xidmətinə gətirən də mərhum general Firudin Nəbiyev olub. F.Nəbiyev 2018-ci ildə xidmət rəisi postundan uzaqlaşandan sonra İ.Məmmədov də oradan çıxaraq, Bakı Şəhər Ticarət və Xidmət Departamentinin direktoru vəzifəsinə keçib. İ.Məmmədovla F.Nəbiyevin ailəsi ilə biznes ortağı olduğu haqda məlumatlar var. Yasamal rayonunda “Beşmərtəbə” yeraltı keçidində ticarət mərkəzi, Binəqədi rayonunda yerləşən üçmərtəbəli “Ata” supermarketi, “Elay” şadlıq evi (Bayılda), “Ata” market (Montində), Novxanıda restoran və Nabranda “Orxan” İstirahət Mərkəzi, “Fashion Club” gözəllik salonu və Otel (Teymur Əliyev küçəsində), Xudatda fermer təsərrüfatı (500 ha) və çoxsaylı kafelər, dayanacaqlar, yeni tikilən binalar (Masazırda) və yanacaqdoldurma məntəqələri. Onun biznesinə bunlar daxildir, lakin bunlar yalnız bilinənlərdir, bilinməyən nələri var, onu da bir özləri bilir, bir Allah.
Məlumdur ki, İntiqam Məmmədov Miqrasiya Xidmətində işləyərkən, miqrasiya işləri ilə yox, bizneslə məşğul olub. Sirr deyil ki, bu biznesin “mayası” da məhz dövlət büdcəsindən ayrılan vəsaitlərdir. İntiqam Məmmədov 2018-ci ildə direkroru olduğu Bakı Şəhər Ticarət və Xidmət Departamentində də öz biznesini idarə etmək və böyütməklə məşğul olub. İntiqam Məmmədovun direktoru olduğu idarəni şəxsi biznesi kimi idarə etdiyi, sahibkarları taladığı haqda məlumatlar var. Oğlunun avtomobil kolleksiyasına və özünün biznes şəbəkəsinə diqqət etdikdə də bu məlumat – sahibkarlara zülm etdiyi təsdiqlənir. Misal üçün, departament rəhbəri sahikbarlardan “haqq” alır, o cümlədən, qanunsuz küçə ticarətini maddi maraq qarşılığında inkişaf etdirir, kim haqq vermirsə, həmin yerləri bağlatdırır.
Ötən ay mediada yayılan məlumatlara görə, İntiqam Məmmədov “20 Yanvar” metrostansiyasının keçidlərində və küçədəki ticarət obyektlərini ələ keçirməyə çalışır. Hətta, “20 Yanvar” metrosyansiyasının keçidindəki sahibkarların bu məsələ ilə bağlı şikayətləri mediada yayılıb. Həmçinin, İntiqam Məmmədov özünə məxsus olan “Beşnərtəbə” və “28 May” yeraltı keçidlərində ticarəti saxlatdırır, ancaq “20 Yanvar” yeraltı keçidində çalışan yüzlərlə sahibkarın çörəyinə bais olaraq, onları dövlətdən narazı salmağa çalışır.
İntiqam Məmmədovun bu qədər qanunsuzluğuna, korrupsiya və dövlət büdcəsini talamasına baxdıqda, oğlunun milyonluq avtomobil kolleksiyasının olması heç də təəcüblü deyil!
