Jurnalist Səbuhi Məmmədlinin son durumu açıqlanıb
Lent.az xəbər verir ki, bu gün APA Media Groupun rəhbərliyi jurnalistin müalicə aldığı Bakı Sağlamlıq Mərkəzinin rəhbərliyi ilə görüşüb.
Bildirilib ki, reanimasiyada müalicəsi davam etdirilən jurnalist hələ də komatoz vəziyyətdədir və kənar təsirlərə reaksiya vermir. Xəstənin komatoz vəziyyətdən çıxması üçün lazım olan bütün zəruri tədbirlər həyata keçirilir.
Qeyd edək ki, Respublika Mərkəzi xəstəxanasında böyrək və şəkərli diabet problemi ilə bağlı müalicə olunan Səbuhi Məmmədli digər ayağının damarlarında yaranmış problemlə bağlı Bakı Sağlamlıq Mərkəzinə köçürülüb. Burda əməliyyatı uğurla başa çatmış jurnalistin vəziyyəti sonradan ağırlaşıb. Dərhal reanimasiyaya yerləşdirilən jurnalistin durumu ağır qiymətləndirilir.
Xatırladaq ki, Səbuhi Məmmədli Lent.az saytının əməkdaşıdır. APA Media Group jurnalist Səbuhi Məmmədlinin durumu ilə bağlı vəziyyəti yaxından izləyir və diqqətdə saxlayır.
