Hacibala Abutalıbovun “sağ əli”ni evə buraxmadılar
Bakı Ağır Cinayətlər Məhkəməsində Bakı şəhər İcra Hakimiyyətinin keçmiş Aparat rəhbəri, bir müddət icra başçısının müavini səlahiyyətlərini icra etmiş Rasim Quliyevin cinayət işi hazırlıq iclası keçirilib.
Virtualaz.org-un xəbərinə görə, hakim Faiq Qəniyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.
Hakim R.Quliyevə hüquqlarını izah edib. Daha sonra təqsirləndirilən şəxsin vəkilləri Fuad Quliyev və Rəsul Yusifbəyli vəsatətlə məhkəməyə müraciət ediblər. Müdafiəçilər R.Quliyev barəsində seçilmiş həbs qətimkan tədbirinin ev dustaqlığı ilə dəyişdirilməsini xahiş ediblər.
Məhkəmə vəsatəti təmin etməyib. Məhkəmə baxışı avqustun 23-ə təyin edilib.
Qeyd edək ki, cinayət işi üzrə Bakı şəhər İcra Hakimiyyəti və Dövlət Şəhərsalma və Arxitektura Komitəsi zərərçəkmiş qismində tanınıb.
