ATƏT PA-nın sessiyasında Dağlıq Qarabağ münaqişəsi müzakirə olunacaq
ATƏT Parlament Assambleyasının iyunun 7-11-də Berlində keçiriləcək illik sessiyasında Dağlıq Qarabağ münaqişəsi müzakirə olunacaq.
APA-nın qurumun saytına istinadən verdiyi məlumata görə, sessiya zamanı qurumun Siyasi məsələlər və Təhlükəsizlik Baş Komitəsinin iclasında Cənubi Qafqaz üzrə keçmiş xüsusi nümayəndə Kristian Vigeninin müəllifi olduğu “ATƏT öhdəliklərinin yerinə yetirilməsi: parlamentin rolu” adlı hesabat layihəsi dinləniləcək.
Hesabat layihəsində bildirilir ki, Dağlıq Qarabağ münaqişəsinin həlli istiqamətində irəliləyişi olmaması və son illər təmas xəttində bir neçə dəfə atəşkəs rejiminin pozulması narahatlıq mənbəyidir: “Növbəti hərbi toqquşmadan və vəziyyətin yenidən gərginləşməsindən yayınmaq üçün bütün tərəflərin danışıqlar masasına qayıtması vacibdir. ATƏT vəziyyəti stabilləşdirmək və hərtərəfli sülh sazişi istiqamətində iş aparmaq üçün Minsk qrupu və ATƏT PA da daxil olmaqla, bütün mexanizmləri tam işə salmalıdır”.
İclasın sonunda qəbul olunacaq qətnamə layihəsi də açıqlanıb. Layihədə deyilir ki, ATƏT PA Dağlıq Qarabağ münaqişəsinin həlli istiqamətində irəliləyişin olmamasından təəssüflənərək tərəfləri təxirəsalınmaz şəkildə hərtərəfli danışıqlara qoşulmağa səsləyir, onları münaqişənin tez bir zamanda dayanıqlı həllini tapmağa, ATƏT Minsk qrupu həmsədrlərini isə bu istiqamətdə səylərini iki dəfə artırmağa çağırır.
