"Elə şəxslər var ki, haqqı çatsa da əlillik ala bilmir" - Siyavuş Novruzov

"Elə şəxslər var ki, haqqı çatsa da əlillik ala bilmir" -

“Dünya ölkələri ilə müqayisədə əlilliyi olan şəxslərin sayı Azərbaycanda ümumi əhalinin sayına nisbətdə xeyli çoxdur”.

APA-nın məlumatına görə, bunu Milli Məclisin bu gün keçirilən iclasında Yeni Azərbaycan Partiyasının (YAP) İcra katibinin müavini, MM-in İctimai birliklər və dini qurumlar komitəsinin sədri Siyavuş Novruzov bildirib.

O qeyd edib ki, buna səbəb əlillik statusunun daha çox verilməsidir: “Düzdür, bizdə hər iki müharibənin (Əfqanıstan və Qarabağı nəzərdə tutulur - red.) iştirakçıları var. Amma dinc dövrdə əlillərin sayı sanki müharibə dövründən daha sürətlə artır. Elə şəxslər var ki, onların haqqı çatmasa da, əlillik ala bilir. Elələri də var ki, haqqı çatır, ala bilmir. Azərbaycanda əlillərin sayı dünya ölkələri ilə müqayisədə çox yüksəkdir. Ayrı-ayrı strukturlar tərəfindən əlillik dərəcələri düzgün şəkildə verilməyib. Əlillik düzgün müəyyənləşdirilsə və verilsə, həqiqi əlillərin pensiya və müavinətlərinin artırılması məsələsi gündəmə gələ bilər”.

S. Novruzovun sözlərinə görə, elə əlillər var ki, işləyə bilərlər: “Əlilləri cəmiyyətdən təcrid etmək deyil, onları cəmiyyətin aktiv üzvü kimi fəaliyyətə cəlb etmək lazımdır. Elə əlillər var ki, oturaq şəkildə çalışa bilərlər.

Azərbaycan qanunvericiliyinə görə hər hansı təşkilat bağlandıqda orada ən son əlillər, müharibə veteranları işdən uzaqlaşdırılmalıdır. Çünki bu insanların iş axtarması digərlərinə nisbətən çətindir.

Bu məsələ qanunda təsbit olunsa da, bəzi strukturlar buna əməl etmir. Buna ciddi nəzarət olunmalıdır. Deputat həmkarlarıma kifayət qədər şikayət gəlir. Aidiyyəti strukturlar buna ciddi nəzarət etməlidir ki, bu cür insanların hüquqları daim qorunsun. İllərdir ki, əlilliyin müəyyənləşməsi ilə bağlı atılan addımlar parlamentdə müzakirə olunub. Hesab edirəm ki, hazırda buna yeni nəzərlərlə baxmalıyıq. Əlilliyin verilməsi ədalət prinsiplərinə əsaslanmalıdır”.



Twitter Facebook Myspace Stumbleupon Technorati blogger google
624 dəfə oxundu
 



XƏBƏR LENTİ
Loading...