Kürdəmirdə xəstəxanaya müraciət edənlərin sayı artıb
Kürdəmir rayonunda sərtləşdirilmiş karantin rejimi başlayandan bəri istər rayon mərkəzindən, istərsə də kəndlərdən xəstəxanaya müraciətlərin sayında kəskin artım müşahidə olunur.
Bu barədə "Report"un Yuxarı Şirvan bürosuna Kürdəmir Rayon Mərkəzi Xəstəxanasından məlumat verilib.
Bildirilib ki, son iki gündə Kürdəmir Rayon Mərkəzi Xəstəxanasının Təcili tibbi yardım şöbəsinə yüzdən çox müraciət daxil olub. Şöbə müdiri Babək Tahirov deyib ki, müraciət edənlərin böyük əksəriyyəti hərarəti olan ürək çatışmazlığından əziyyət çəkən pasiyentlərdir.
Qeyd edək ki, Kürdəmir rayonunda sərtləşdirilmiş karantin rejiminin tətbiqi ilə əlaqədar 6 həkim briqadası yaradılıb və kənd tibb məntəqələridə gücləndirilmiş iş rejimində fəaliyyət göstərirlər. Sərt karantin rejimi iyunun 16-sı saat 06:00-da başa çatacaq.
