Cəlilabadda 14 kəndi birləşdirən yol qəzalı vəziyyətdədir
Bu barədə "Report"un Muğan bürosuna kənd sakinləri məlumat verib.
Onların sözlərinə görə, 14 kəndi birləşdirən Qarazəncir-Qarakazımlı-Bayxanlı avtomobil yolu dağılmaq təhlükəsi ilə üz-üzədir:
"Bu yol bir neçə il öncə istismara verilib. Amma yolun təxminən 20 km-lik hissəsi yararsız vəziyyətdədir. Yolda əmələ gələn iri çartlar, çalalar və qoyulan aldadıcı yamaqlar tez-tez bizə problem yaradır. Əlbəttə yollar rahat olanda biz də istərdik ki, gediş-gəliş də rahatçılıq olsun. Rahat gedək-rahat gələk, texnikada problem yaranır. Yağışda, qarda bu yolda hərəkət daha da çətinləşir".
Problemlə bağlı Azərbaycan Avtomobil Yolları Dövlət Agentliyindən bildirilib ki, bu yol artıq regionların sosial- iqtisadi inkişafı dövlət proqramına salınıb.
Qeyd edək ki, ümumi uzunluğu 34 km, eni 8 metr olan yol 4-cü texniki dərəcəyə aiddir və gündəlik olaraq 20 mindən çox əhali bu yoldan istifadə edir.
