Masallıda fermerin əkin sahəsinə basqın edildi - VİDEO
Masallıda fermer Anar Abbasovun təsərrüfatına basqın edilib.
Bu barədə Qaynarinfo-ya fermer Anar Abbasov özü məlumat verib. Fermer ona basqın nəticəsində 1500 manat ziyan vurulduğunu bildirib:
"Baxın, insanlığa sığmayan hərəkətdir, mənim kənddə olmadığımı bilib, bir qrup şəxs əkin sahəmə basqın edib, nəticədə suvarma üçün quraşdırılan 260 metr ana boruları dağıdıb. Boruları bir-birindən ayırıb, hərəsini bir tərəfə atıblar”.
Anar Abbasov dəfələrlə belə hadisələrlə üz-üzə qaldığını vurğulayıb:"Şikayət etmişəm, amma reaksiya verməyiblər. Bunu belə qoymaq olmaz. Kənddə 8 min əhali var, heç bir adamla düşmənçiliyim yoxdir. Bunu kim edib bilmirəm, xahiş edirəm əlaqədar orqanlardan mənə ziyan vuranları, sahibkarlığın inkişafına mane olanları tapıb cəzalandırsınlar”.
Anar Abbasov həmin günü qızını Bakıya xəstəxanaya gətirdiyini deyib:"Yanvarın 23-də qızım Zeynəbin halı pisləşmişdi. Qolunda yaranmış şiş ilə bağlı təcili Bakıya Milli Onkologiya mərkəzinə apardım. Başım qarışdı, qızımın səhhəti ilə məşğul oldum, onlar da bundan istifadə edib, sahəmə hücum etdilər”.
