Bu da pul qazanmağın yeni yolu: "Benzinim qurtarıb, yolda qalmışam..."
Ölkədə insanların aldatmağın yeni formasını tapıblar. Sosial şəbəkələrdə yayılan bir məlumata görə, dilənçilərdən fərqli olaraq yaxşı geyimdə olan, normal qiymətə maşın sürən şəxs yolda digər sürücünü saxlayır və ondan müxtəlif bəhanələrlə pul almaq istəyir. Dələduzluqla məşğul olan həmin şəxs saxlatdığı sürücülərə pirə gedərkən yolda qaldığını, benzinin bitdiyini, maşının xarab olduğunu və bu cür başqa bəhanələr gətirərək 10-20 manat arası pul istəyir. Dələduz bu cür hərəkətlərlə insanların inanclarından suiistifadə edir, sadə vətəndaşları aldadıb asan yolla qazanmağa cəhd göstərir.
Artıq bir neçə gündür sosial şəbəkələrdə məsələ ciddi müzakirə olunur.
Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov modern.az-a bildirib ki, dələduzluqla bağlı məsələlər aidiyyəti üzrə həll olunur və bu kimi hadisələrin təkrar olunmaması üçün təbliğat aparılmalıdır: “Hər deyilənə aldanmaq lazım deyil. Aldatma yolu ilə vətəndaşların mülklərini əldə etmək istəyənlər var. Bəzən təbliğat yolu ilə insanları başa salmaq mümkündür və indi kimsə kimisə aldadırsa, bunun əvvəl-axır üstü açılır, aidiyyəti qurumlar üzrə tədbirlər görülür”.
V.Əsədov bu günə kimi belə faktların açılmamasını həmin şəxslər barəsində şikayət edilməməsilə əlaqələndirib: “Yolun ənarında vətəndaş aldadıcı formada özünü göstərib 3-5 manat pul istəyir. İmkanı olan şəxs də verir, sonra da gedib şikayət etmir ki, filan sürücü məndən pul istədi. Vətəndaşın xahişi əsasında bir nəfər digərinə kömək edirsə, bunu dilə gətirmir. İndi dediyiniz sürücü bir səhnə yaradıb xahiş edirsə ki, “mənə kömək et”, imkanı olan şəxs də yardım göstərir, amma heç ağlına da gətirmir ki, onu aldadırlar”.
