Dövlətin Su Ehtiyyatları Agentliyi, yoxsa Zaur Mikayılovun "Qudalar Vadisi"?
Bu da səbəbsiz deyil. Zaur Mikayılov ADSEA-nın rəhbəri təyin olunduqdan sonra mediada belə xəbərlər yayılmışdı ki, o, öz qohum-qudalarını qurumda rəhbər vəzifələrə təyin edib və bu strukturda rəsmi vəzifə səlahiyyətləri deyil, “patriarxal qanunlar” işləyir. Konkret olaraq deyilirdi ki, Agentliyin sədri Zaur Mikayılovun qurumun Aparat rəhbəri vəzifəsinə Fuad Quliyev təyin edilib. 2021-ci ildən Azərbaycan Meliorasiya və Su Təsərrüfatı Açıq Səhmdar Cəmiyyətində sədrin müşaviri vəzifəsində çalışmış Fuad Quliyevin Dövlət Su Ehtiyatları Agentliyinin sədri Zaur Mikayılovun qudasıdır. Eyni zamanda, qeyd olunurdu ki, Zaur Mikayılov daha bir qudasını da özünə müşavir təyin edib. Bu müşavirin Şirinov Əsəd Əli oğlu olduğu deyilirdi.
Mənbə: https://qafqazinfo.az/news/detail/zaur-mikayilov-diger-qudasina-da-yuksek-vezife-verib-yenilenib-438325
Bu məlumatlar geniş ictimai rezonans doğurdu və ADSEA məsələni ört-basdır etməyə çalışdı. Daha doğrusu, həmin şəxslərin adları qurumun rəsmi saytından silindi və mətbuata belə bir məlumat ötürüldü ki, Zaur Mikayılovun özünə müşavir təyin etdiyi qudası Əsəd Şirinov artıq vəzifəsindən istefa verib. Agentlik sədrinin müşaviri vəzifəsindən Aparat rəhbəri vəzifəsinə təyin etdiyi digər bir qudası Fuad Quliyevin də təyinatı müvəqqəti olaraq dayandırılıb. Artıq ləğv edilən Azərbaycan Meliorasiya və Su Təsərrüfatı Açıq Səhmdar Cəmiyyətinin saytından da sözügedən vəzifəli şəxslərin adları silinib. Məsələ ilə bağlı Meliorasiya və Su Təsərrüfatı ASC-nin Mətbuat xidmətindən cavab almaq mümkün olmamışdı.
Mənbə: https://qafqazinfo.az/news/detail/zaur-mikayilov-vezife-verdiyi-qudalarini-isden-cixarib-439116
Lakin qısa müddətdən sonra məlum oldu ki, Zaur Mikayılovun qudalarının işdən çıxarılması barədə məlumatlar heç də həqiqət deyil. Hərçənd Fuad Quliyevin vəzifəsini “müvəqqəti dayandırması” barədə məlumatlar elə bəribaşdan həqiqətə bənzəmirdi ona görə ki, “vəzifəsini dondurmaq” Surət Hüseynovun qarşsından qaçan AXC hakimiyyətinin məsul şəxslərinin hoqqası idi. Azərbaycanda, əlbəttə, güclü mərkəzi hakimiyyət var və kiminsə bu gün vəzifəsini dondurması, sabah üstünə isti su töküb buzu əritməsi mümkün deyil. ADSEA-nın rəsmin saytında hazırda bir sıra məsul şəxslərin adı doğrudan da yoxdur. Ancaq obrazlı desək, cidanı çuvalda gizlətmək də mümkün deyil. ADSEA rəhbərliyinin qəbul qrafikindən görünür ki, Zaur Mikayılovun qudaları yenə iş başındadırlar. Bu isə, həm dövlət idarəçiliyinin əsas prinsiplərinə, həm “Korrupsiyaya qarşı mübarizə haqqında” qanuna və digər qanunlara açıq-aşkar ziddir, dövlət qurumlarında maraqlar konfliktinin tipik təzahürüdür. KİV-də yayımlanan məlumatlara görə, bu adamları heç də sözügedən qurumdakı "ailə konfederasiyası"nın bütün mənsublarını əhatə etmir, ancaq bu qədər qabarıq isimlərdən sonra daha kiçik ranqlı fiqurların üzərinə diqqət cəmləməyə də dəymir.
Çox təəssüflər olsun ki, kütləvi informasiya vasitələrində “Qudalar agentliyi” adlandırılan ADSEA-nın fəaliyyəti haqqında çox sayda neqativ informasiya dolaşır. Bu iddiaları Google vasitəsi ilə hər bir oxucu tapa və məlumatlana bilər. Zamanımızda bütün dünyada su ehtiyyatları strateji mahiyyət daşıyır və Azərbaycanın bu sahədə təbii problemləri var. Ancaq diplomunun rəsmən tanınmadığı barədə iddialar səslənən adamlara qohumluq zəminində vəzifə verməklə Zaur Mikayılovun dövlətin idarəçilik strategiyasını heçə sayması bu problemlərin həllini daha da mürəkkəbləşdirir. Odur ki, Zaur Mikayılov dövlət idarəçiliyinin əsasında dayanan şəffaflıq prinsipinə uyğun olaraq, ictimaiyyət önünə çıxmalı, özü və qohumları barədə, klanının sahibkarlıq fəaliyyəti ilə bağlı səslənən iddialara cavab verməlidir. Əks halda, cəmiyyəti və dövləti bir gün, iki gün aldatmaq olar. Üçüncü gün dövlət mütləq hesab sorar.
