Şahdağa 5 santimetr qar yağıb - FAKTİKİ HAVA
Respublika üzrə müşahidə olunan faktiki hava açıqlanıb.
Ekologiya və Təbi Sərvətlər Nazirliyinin Milli Hidrometeorologiya Xidmətinin mayın 5-i saat 11:00-a verdiyi məlumata əsasən, ölkə ərazisidə hava şəraiti kəskin dəyişib, bəzi yerlərdə şimşək çaxıb, arabir yağış yağıb, ayrı-ayrı yerlərdə intensiv və güclü olub.
Şimal-qərb küləyi əsib, bəzi yerlərdə arabir güclənib. Yağan güclü yağışlar nəticəsində əksər çaylarda sululuq artıb, Əsrik, Əsrikçay Cırdaxan, Kürəkçay, Gəncəçay Alaxançallıdan qısamüddətli sel və daşqın keçib. Şahdağ və Xınalıqda qar yağıb. Qar örtüyünün hündürlüyü Şahdağda 5, Xınalıqda 3 sm olub.
Düşən yağıntının miqdarı Yuxarı Qarabağda 5-16 mm, Daşkəsəndə 24 mm, Qazax-Gəncədə 3-14 mm, Naftalanda 21 mm, Böyük Qafqazda 2-16 mm, bəzi yerlərdə 25-40 mm, Mərkəzi Aranda 2-6 mm, Tərtərdə 21 mm (aylıq normanın 41 faizi), Mingəçevirdə 17 mm (aylıq normanın 37 faizi), Lənkəran-Astara zonasında 2 mm, Naxçıvan MR-da 1-9 mm olub.
Şimal-qərb küləyi əsib, arabir Neftçalada 28 m/s, Biləsuvarda 20 m/s, Naftalanda 18 m/s, Abşeron yarımadasında, Bakı, Maştağa, Qum adasında 28 m/s, Pirallahıda 25 m/s, Sumqayıtda 24 m/s, Çilov adası, Neft Daşlarında 20 m/s-dək güclənib. Neft Daşları stansiyasının məlumatına əsasən dalğanın hündürlüyü 4.5 metrə çatıb.
