Əfv Komissiyasına çoxsaylı müraciət var
“Dünya Azərbaycanlılarının Həmrəyliyi Günü və Yeni il ərəfəsində Prezident İlham Əliyev tərəfindən əfv sərəncamının imzalanacağı istisna edilmir”. Bunu Modern.az-a Əfv Məsələləri Komissiyanın üzvü Əliməmməd Nuriyev bildirib. O qeyd edib ki, Əfv Məsələləri Komissiyasının katibliyi və Prezident Administrasiyası Hüquq-mühafizə orqanları ilə iş şöbəsinin Əfv sektoru daimi olaraq əfvlə bağlı müraciətləri qəbul edir: “Bunun əsasında müvafiq arayışlar hazırlanır. Eyni zamanda Komissiya üzvlərinə daxil olan məktub və müraciətləri də katibliyə göndəririk.
İclasların çağırılması Komissiyanın sədri tərəfindən həyata keçirilir. İlin sonuna xeyli vaxt qaldığından hələlik iclaslar keçirilməyib. Hazırda katiblik və sektor işləyir ki, müraciətlər toplansın. Bütün bunlar toplanandan sonra Komissiyanın sədri iclasın keçirilməsi üçün vaxt müəyyən edəcək.
Onu da qeyd edim ki, Dünya Azərbaycanlılarının Həmrəylik Günü və Yeni il münasibətilə cənab Prezidentin əfv sərəncamı imzalayacağı barədə qəti fikir söyləmək çətindir. Çünki əfvetmə Prezidentin müstəsna hüququdur və sərəncam barədə özü qərar verir. Ümumiyyətlə, son illərin təcrübəsinə baxsaq, görərik ki, hər ilin sonunda əfv sərəncamı imzalanıb”. Ə.Nuriyev deyib ki, ölkəmiz müstəqillik əldə etdikdən bu günə qədər 61 əfv sərəncamı imzalanıb:
“Nəticədə 9 minə yaxın şəxs cəzadan azad edilib. Bunu nəzərə alsaq, bu il də əfv sərəncamının imzalanması istisna edilmir. Cənab Prezident hər zaman öz vətəndaşlarına münasibətdə mərhəmətlı çıxış edir, çoxsaylı insanlar azadlığa, ailəsinə qovuşur. Ümid edək ki, bu il də növbəti qovuşmalara şahidlik edəcəyik”.
