Aİ İsrailin özünü müdafiə etmək hüququnu tanıyıb
APA xəbər verir ki, bu barədə Aİ-nin Xarici siyasət və Təhülkəsizlik məsələləri üzrə Ali Nümayəndəsi Cozep Borrellin bəyanatında bildirilib.
Bəyanatda qeyd olunub ki Aİ Qəzzada dərinləşən humanitar böhrandan ciddi narahatlıq duyur.
"Aİ hərbi əməliyyatların dərhal dayandırılması və humanitar yardımın Qəzza əhalisinə təhlükəsiz şəkildə çatması üçün sərhəd keçidlərində imkanların artırılması və xüsusi dəniz marşrutu da daxil olmaqla humanitar dəhlizlərin yaradılması çağırışlarına qoşulur", - deyə Aİ-nin ali nümayəndəsi Borrell bildirib.
Bəyanatda qeyd olunub ki, Aİ İsrailin özünü müdafiə etmək hüququnu tanıyır.
"Aİ humanitar dəhlizlər və humanitar ehtiyaclar üçün fasilələr də daxil olmaqla, bütün zəruri tədbirlər vasitəsilə ehtiyacı olanlara yetişmək üçün davamlı, sürətli, təhlükəsiz və maneəsiz humanitar giriş və yardıma çağırır. Bu baxımdan biz noyabrın 9-da Parisdə keçirilən humanitar konfransın nəticələrini alqışlayırıq".
Bəyanatda həmçinin HAMAS-a bütün girovların dərhal və qeyd-şərtsiz azad edilməsi üçün çağırış təkrarlanıb.
Beynəlxalq Qırmızı Xaç Komitəsinə (BQXK) girovlarla əlaqəyə icazə verilməsinin vacibliyi vurğulanıb.
"Aİ HAMAS-ın xəstəxanalar və mülki şəxslərdən canlı qalxan kimi istifadəsini pisləyir. Mülki şəxslərin döyüş bölgəsini tərk etməsinə icazə verilməlidir. Bu döyüşlər mülki əhali və tibb işçilərinə dəhşətli zərbə vurur. Aİ vurğulayır ki, beynəlxalq hüquq xəstəxanaların, tibbi ləvazimatların və xəstəxanalardakı mülki şəxslərin qorunmasını tələb edir. Xəstəxanalar həmçinin təcili tibbi yardım ləvazimatları ilə dərhal təmin edilməli və ehtiyacı olan xəstələr təhlükəsiz şəkildə təxliyə edilməlidir. Bu kontekstdə biz İsraili mülki şəxslərin müdafiəsini təmin etmək üçün maksimum təmkin nümayiş etdirməyə çağırırıq. Aİ və onun üzv dövlətləri davamlı yardımı təmin etmək və qida, su, tibbi xidmət, yanacaq və sığınacaq əldə etmək imkanını asanlaşdırmaq üçün beynəlxalq tərəfdaşlar, BMT və digər qurumlar eləcə də region ölkələri ilə sıx əməkdaşlığı davam etdirəcək", - deyə Borrellin bəyanatında vurğulanıb.
