BP-yə azərbaycanlı vitse-prezident təyin olunur
BP-nin hazırda Çıraq və Dərinsulu Günəşli sahəsi üzrə əməliyyatlar meneceri olan Orxan Quliyev 15 iyun 2016-cı il tarixindən BP-nin texniki təhlükəsizlik və əməliyyat riski üzrə vitse-prezidenti təyin olunur.
Şirkətdən Trend-ə verilən məlumata görə, bu yeni vəzifədə O.Quliyev BP-nin Azərbaycan, Gürcüstan və Türkiyə regionu üzrə rəhbər qrupunun üzvü olmaqla regional əməliyyat risklərinə müstəqil baxış və risklərə qarşı baryerlərin gücünü təsdiq edən əminlik fəaliyyətinin icrasına cavabdeh olacaq. Bu vəzifədə O.Quliyev BP-də 37 illik xidmətdən sonra təqaüdə çıxan indiki vitse-prezident Robert Uottu əvəz edəcək ki, bu da BP-nin kadrların milliləşdirilməsi planına uyğundur.
BP-də çalışdığı 20 ildən artıq bir müddət ərzində O.Quliyev Azərbaycan, Gürcüstan və Türkiyə regionu üzrə əməliyyatlar və iri layihələr sahəsində dərin təcrübə qazanıb. Bundan əvvəl O.Quliyev dənizdə əməliyyatlar üzrə qrup rəhbəri və platforma meneceri kimi yüksək texniki bilik və məsuliyyət tələb edən vəzifələrdə çalışıb. Daha öncə isə o, Bakı-Tbilisi-Ceyhan, Cənubi Qafqaz Boru Kəməri və Azəri-Çıraq-Günəşli layihələrində layihə mühəndisi və layihə meneceri kimi işləyib, həmçinin BP-nin Birləşmiş Krallıqdakı mühəndis-layihə idarələrində müxtəlif vəzifələr tutub.
O.Quliyev Azərbaycan Memarlıq və İnşaat Universitetininin inşaat mühəndisliyi üzrə magistraturasını bitirdikdən sonra Azərbaycan Dövlət Neft Akademiyasında (indiki Azərbaycan Dövlət Neft və Sənaye Universiteti) qaz axınının dinamikası üzrə fəlsəfə doktoru elmi dərəcəsini alıb. O.Quliyev, həmçinin digər ixtisaslar üzrə qərb universitetlərində də təhsil alıb - onun Böyük Britaniyanın Henli Kollecindən neft və qaz sənayesi idarəçiliyi üzrə diplomu var və 2014-cü ildə ABŞ-ın Boston şəhərində yerləşən Massaçusets Texnologiya İnsitutunun Əməliyyatlar Akademiyasını bitirib.
O, neft və qaz sənayesinin inkişafına töhfəsinə görə 2009-cu ildə Azərbaycan Prezidenti tərəfindən “Tərəqqi” medalına layiq görülüb.
Evlidir, iki övladı var.
