Nərgiz Yaqublu vəfat etdi
Tofiq Yaqublunun qızı Nərgiz Yaqublu Rusiyanın Tomsk şəhərində, müalicə olunduğu xəstəxanada vəfat edib.
O, xeyli müddət idi ki, gənc yaşında yoluxduğu ağır xəstəlikdən müalicə olunurdu və durumu kritik vəziyyətdə idi. Nə yazıq ki, bu gənc, gözəl, bu gün-sabah ana olacaq xanım ağır xəstəliyə qalib gələ bilmədi və bütün sevənlərini, dostlarını, iş və əqidə yoldaşlarını qəhərə boğdu. Artıq sosiaı şəbəkədə yüzlərlə istifadəçi Nərgizin vaxtsız vəfatından üzüntüsünü dilə gətirir, bu ağır xəbəri və kədəri bir-birilə paylaşırlar.
Milli Strateji Düşüncə Mərkəzinin sədri İsa Qəmbər Nərgiz Yaqublunun vəfatına dair yazıb: "Dünya və biz bu gözəlliyi itirdik. Tanrı ruhunu şad eləsin..."
"Yeni Müsavat" ailəsi Nərgizin yaxınlarına, onu sevənlərə və xüsusi ilə də hazırda həbsdə olan Tofiq Yaqubluya dərin hüznlə başsağlığı verir və səbr diləyir.
Musavat.com bildirir ki, həbsxanada olan Tofiq Yaqublunun azadlığa çıxması üçün hələ ötən həftə "Yeni Müsavat" qəzetinin baş redaktoru Rauf Arifoğlu ölkə prezidentinə məktubla müraciət edib.
