Fəhlələr “Azərinşaat”ın qarşısında etiraz aksiyası keçirib
“Pullarımızı verin!”
“Azərinşaat” MMC-nin yol tikintisində işləyən və may ayından maaşını ala bilməyən fəhlələri bu gün-dekabrın 7-də növbəti dəfə şirkətin ofisi qarşısında etiraz aksiyasına toplaşıb. Aksiyada iştirak edən fəhlələrdən birinin -Hidayət Mərdanovun virtualaz.org saytına verdiyi məlumata görə, 50-yə yaxın fəhlə onlara çatacaq əmək haqlarının ödənilməsini tələb edir.
Lakin şirkətdən onlara pulun ödənilməyəcəyini deyiblər: “Bizə dedilər ki, siz qeyri-qanuni işçi olmusunuz. Yəni iddia edirlər ki, biz şirkətin rəsmi işçiləri olmamışıq. Buna görə də əməkhaqqı ödənilmir”. H.Mərdanov qeyd etdi ki, məvaciblər ödənilməyəcəyinədək aksiya keçiriləcəklər: “Biz Şamaxı, Lənkəran-Astara yolunun çəkilişini həyata keçirmişik. Hamımız fəhləlik etmişik. İndi pulumuzu ala bilmirik, acıq. Tələb edirik ki, pullarımızı versinlər”.
Fəhlələr maaşlar ödənilməyəcəyinədək “Azərinşaat” MMC-nin qarşısından getməyəcəklərini deyiblər. Bundan əvvəl şirkətin işçilərinin bir qisminin əmək haqqı sifarişçi təşkilat olan “Azəryolservis”dən ödənilmişdi.
