“Yanğın hələ 10 gün də davam edə bilər” – Mirvari Qəhrəmanlı
““Günəşli” yatağındakı 10 saylı dərin dəniz özülündə baş vermiş yanğının hələ 10 gün də davam edə bilər”.
Bunu AzNews.az-a açıqlamasında Neftçilərin Hüquqlarının Müdafiə Təşkilatının sədri Mirvari Qəhrəmanlı deyib. Onun sözlərinə görə, sözügedən yataqda baş verən yanğının söndürülməsi Fövqəladə Hallar Nazirliyinin texnikasından, təcrübəsindən və səriştəsindən asılıdır: ““Günəşli” neft, qaz yatağıdır. Neft yataqlarında müxtəlif vaxtlarda yanğın olub və bu, uzun müddət davam edib. Bundan əvvəl Abşeronun qazma buruğunda yanma hadisəsi baş vermişdi. O yanğın 10 gün davam etmişdi. Ona görə də indiki yanğının da nə vaxt söndürülücəyi ilə bağlı konkret söz demək olmur”.
M.Qəhrəmalı “Günəşli” yatağında baş verən yanğının ekologiyaya təsiri məsələsinə də toxunub: “Yanğının ekologiyaya vurduğu ziyan da elə-belə məsələ deyil. Hazırda bu istiqamətdə müzakirələr və hesablamalar aparılır. Ekologiya və Təbii Sərvətlər Nazirliyi yanğın nəticəsində ekologiyaya dəyən ziyanı ictimaiyyətə açıqlayacaq”.
Qeyd edək ki, dekabrın 4-də “Günəşli” yatağındakı 10 saylı dərin dəniz özülündə yanğın baş verib. Xilasetmə əməliyyatı nəticəsində 33 nəfər xilas edilib. 8 nəfərin cəsədi tapılıb. Hazırda 23 nəfərin axtarışı davam etdirilir.
