Azərbaycanlı diplomat 70 kq qızılı haradan alıb? – Diqqətçəkən detal
M.G.Ş. adlı şübhəli saxlanılıb. Onun polisə qızılların özünə aid olduğunu və diplomat kimi çalışdığını deməsi isə diqqət çəkib.
Məlumata görə, həmin şəxs bir müddət əvvəl Azərbaycanın ABŞ-dakı səfirliyində hərbi attaşenin köməkçisi vəzifəsində çalışıb. Bununla belə şəxsin ölkəmizin Səudiyyə Ərəbistanında hərbi attaşe təyin olunduğu iddia edilsə də, bu, təsdiq olunmayıb.
Globalinfo.az-a danışan deputat Fazil Mustafa deyib ki, belə bir hadisə baş veribsə, müvafiq hüquq-mühafizə orqanlarının araşdırması nəticəsində məsələ öz həllini tapacaq:
“Buna hər hansı bir şübhə olmamalıdır. O baxımdan bizim hüquq-mühafizə orqanlarına, Dövlət Təhlükəsizlik Xidmətinə güvənməyimiz lazımdır. Obyektiv araşdırma aparıb məsələnin mahiyyəti üzə çıxarılmalıdır”.
Hərbi ekspert Ədalət Verdiyev bildirib ki, hərbi attaşelər adətən öz ölkələrinin silahlı qüvvələrində həqiqi hərbi xidmət keçmiş və müəyyən müddətə diplomatik missiyaya təhkim edilmiş nümayəndələrdir:
“Hərbi attaşenin əsas vəzifələrindən biri, maraqlar dairəsinə aidiyyəti olan hadisələr haqda hesabatları öz departamentinə bilavasitə yaxud, xüsusi vacib hallarda, missiya başçısı vasitəsilə təqdim etməkdir. Müəyyən şəraitlərdə hərbi attaşe silahın alınmasına və ya satılmasına imkan yarada bilər. Əksər ölkələrdə, o, eləcə də nizami qoşunların təlimlərinə dəvət olunur. Hərbi attaşelərin köməkçiləri isə mövcud qanunvericiliyə uyğun vəzifələri icra etmək üçün təyin edilən şəxslərdir”.
“Səudiyyə Ərəbistanı Krallığının Ər-Riyad şəhərində beynəlxalq forum keçirilir və Azərbaycan Ordusunun bir qrup hərbi qulluqçusu beynəlxalq forumda iştirak edir. Bu vaxtda ölkəmizin Səudiyyə Ərəbistanında da hərbi attaşesi olduğunu deyən şəxs 70-kq qaçaqmal qızıl ilə Türkiyədə saxlanılır. Belə şəxslərin xarici ölkələrdə yüksək vəzifələrə təyinatı Azərbaycanı biabır edir” – ekspert bildirib.
