Zeynəb Xanlarova Tofiq Yaqublu ilə bağlı Prezidentə MÜRACİƏT ETDİ
“Bu dəqiqələrdə Zeynəb Xanlarova zəng edib israrla onun fikirlərinin məhz mənim səhifələrimdə paylaşılmasını xahiş etdi. Səbəbini soruşduqda isə bildirdi ki, bu günə qədər onlarla dəfə heç vaxt səsləndirmədiyi “uşaqpulu verilməsin” kimi fikirləri məhz mətbuat yayıb və bilə-bilə onun fikirlərini dəfələrlə təhrif ediblər. Ona görə də Zeynəb xanımın Azərbaycan Respublikası Prezidenti İlham Əliyevə ünvanladığı müraciətini dediyi kimi səhifələrimdə paylaşıram”.
Bu fikirləri tanınmış hüquqşünas Aslan İsmayılov bildirib.
A.İsmayılov Xalq artisti, sabiq deputat Zeynəb Xanlarovanın müraciətini olduğu kimi özünün sosial şəbəkə səhifəsində yerləşdirib. Müraciətdə deyilir:
“Cənab Prezident, Hörmətli İlham müəllim!
Siz məni uzun illərdir ki, tanıyırsınız və səmimiliyimə bələdsiniz. Atanız rəhmətlik Heydər Əliyevə və Sizə münasibətim də dəyişməz olaraq qalıb və qalacaq. Son dövrlərə qədər meydan sulayanlar rəhmətlik Heydər Əliyevdən üz döndərəndə mən heç nəyə baxmayaraq ona hörmətimi açıq ifadə etmişəm və onun Dövlətimiz, Xalqımız, mədəniyyətimiz üçün etdiklərini heç vaxt unutmamışam, açıq demişəm və bu gün də, sabah da eyni fikirdə qalacam. Buna görə də Azərbaycan xalqına və mədəniyyətinə düşmən kəsilənlər əllərində olan imkanlardan istifadə edib uzun illər haqqımda şər-böhtan tirajlayıblar. Bilirsiniz ki, mən mədəniyyət adamıyam və daim siyasətdən uzaq olmağa çalışmışam, ancaq Dövlətimiz, Millətimiz üçün çox vacib olan məsələlərdə susmamışam və susmayacam. Son dövrlər etdiklərinizi bütün varlığımla alqışlayıram və əminəm ki, Dövlətimiz, Xalqımız üçün daha uğurlu işlər görəcəksiniz. Bu gün Sizə Qarabağ qazisi, şəxsən tanıdığım, hörmətlə yanaşdığım və mənim yaradıcılığımın vurğunu olan Tofiq Yaqublu ilə bağlı müraciət edirəm. Əminəm ki, Tofiq Dövlətimiz, Millətimiz üçün ziyanlı addım atmaz. Bu gün onun uzun müddət həbsdə olmasını haqsızlıq kimi dəyərləndirib Sizdən şəxsən xahiş edirəm ki, onun azadlığa buraxılmasına köməklik edəsiniz. Tofiqi mərd Azərbaycan kişisi kimi tanıyıram, bala acısı görmüş adamdır. Bu gün onun həbsdə olması ilə bağlı aclıq etməsi faciə ilə sonuclana bilər. İnanıram ki, belə mövzularda ilk dəfə olaraq Sizə müraciət etməyimi nəzərə alacaqsınız. Bir daha Sizə can sağlığı və Dövlətimiz, Vətənimiz üçün görəcəyiniz işlərdə uğurlar arzulayıram.
