Rüşvət alarkən yaxalanan Mahir Xəttabı neçə il həbs gözləyir? - AÇIQLAMA
Yeni Azərbaycan Partiyasının Binəqədi rayon şöbəsinin sədri Ramiz Göyüşovdan 2 min manat alarkən yaxalanan jurnalist 3 ay müddətinə həbs edilib.
Maraqlıdır, cinayət işinin yekununda Mahir Xəttaba hansı cəza tətbiq edilə bilər?
Məsələ ilə bağlı Sfera.az-a danışan hüquqşünas Turan Abdullazadə jurnalistin 5 ilədək həbs edilə biləcəyini deyib:
"Qeyd etdiyiniz jurnalist barəsində Ramiz Göyüşovu videosunu yaymaqla şantaj edərək 2000 manat pul istəməyinə dair əsaslı şübhələr yarandığı üçün barəsində 3 ay müddətində həbs qətimkan tədbiri seçilib. Bu isə o deməkdir ki artıq jurnalist barəsində cinayət işi başlanıb, 3 ay ərzində istintaq aparılacaq və jurnalist istintaq müddəti gedişində istintaq təcridxanasında saxlanılacaq. Daha sonra toplanılmış materiallar baxılması üçün müvafiq məhkəməyə göndəriləcək. Jurnalistin təqsirləndirildiyi əməldə təqsiri sübuta yetirilərsə, o zaman ona Cinayət qanunvericiliyinə müvafiq qaydada məhkəmə tərəfindən cəza təyin ediləcək.
Azərbaycan Respublikası Cinayət Məcəlləsinin 182.1-ci maddəsinə əsasən hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatlar yayma və ya onların əmlakını tələf etmə hədəsi ilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər etməsini tələb etmə— üç ildən beş ilədək müddətə azadlıqdan məhrum etmə ilə cəzalandırılır".
