“Tender cinayətləri”nin üzə çıxması üçün mütləq nazir həbs olunmalıdır? – Təfərrüat
Yeniavaz.com xəbər verir ki, prosesdə Sabunçu rayonu, Maştağa qəsəbəsində təsərrüfat fəaliyyəti ilə məşğul olan Eldar Əliyev dindirilib. Eldar Əliyev bildirib ki, onun məlumatı olmadan adına şirkətlər açılıb: “Məlikhəsən adlı qonşum var idi. Hər dəfə onu görəndə işsizlikdən şikayət edirdim. Bir gün dedi ki, səni işə düzəldirəm, ayda 200 manat maaş alacaqsan. Maşınla apardı məni sənədlərə qol çəkdik. Mən nə bilim ki, adıma şirkət yaradıb. Necə şirkət rəhbəriyəm ki, evim başıma uçur. Adımı yaza bilməyən adamam, müəssisə nədir? Məlikhəsənin özünün də harada işlədiyini bilmirəm. Qəsəbədə onu quş saxlayan kimi tanıyırdıq".
Məlumat üçün bildirək ki, vətəndaşların xəbəri olmadan onların adına şirkətlərin açılması və sonradan həmin şirkətlər vasitəsilə tenderlərdə və digər əməliyyatlarda saxtakarlığın aparılması barədə əvvəllər dəfələrlə yazmışıq.
Lakin, maraqlıdır ki, hüquq-mühafizə orqanları nə bu yazılarda, nə də sosial şəbəkələrdə yayılan məlumatlara bugünə kimi münasibət bildirməyib. Belə görünür ki, bu cür hallara hüquqi müstəvidə qiymət vermək üçün hansısa yüksək rütbəli məmurun həbs olunması lazımdır.
