Deputat Elnur Allahverdiyevə Rusiyaya dəstək ittihamı - Bu FOTO müzakirələrə səbəb oldu
Mağazaların əsas vitrinində “Samsung Galaxy Z” modelinin reklamı kimi böyük “Z” işarəsi vurulub.
Sosial şəbəkələrdə bu işarənin vurulmasının təsadüf olmadığı ilə bağlı müzakirələr gedir. Hətta siyasilərin, diplomatların olduğu qruplarda bu barədə fikir mübadiləsi aparılır.
Məlum olduğu kimi, Rusiyanın Ukrayna üzərinə hücuma keçən tank və digər zirehli maşınların üzərinə latınca “Z” hərfi yazılıb. Ukrayna sosial şəbəkələrində iddia edilirdi ki, üzərində “Z” hərfi olan texnikalar birbaşa Zelenskini hədəfə alıblar.
Rusiya hərbi saytlarına açıqlama verən ekspert, ehtiyatda olan polkovnik Viktor Baraneç isə bildirib ki, “Z” hərfinin mənası “Zapad”, yəni Qərb deməkdir. Bu hərbi birləşmələr Belarusda hərbi təlim keçirilərkən şərti olaraq “Qərb cəbhəsi” adlandırılıb.
İndi “Z” işarəsi Rusiyanı bu müharibədə az qala simvolizə edir. Hətta Rusiyada müharibə əleyhinə çıxan insanların yaşadığı evlərin qapıları üzərinə bu işarə vurularaq, onların xain olduğunun yazıldığı barədə məlumatlar da var.
Belə bir məqamda “Kontakt Home” mağazalarında “Z”nin peyda olması diqqətdən qaça bilməzdi. İnsanlar inanmaq istəmirlər ki, bu “Z” təkcə “Samsung” telefonlarının “Z” modelinin reklamıdır. Çünki bu heç də son model deyil. Mağazalar adətən son modelləri reklam edirlər.
Düzdür, bəziləri hesab edir ki, bu, sadəcə “Kontakt Home”un PR siyasətidir.
Amma “Z”nin Rusiyaya dəstək mesajı olduğuna inananlar daha çoxdur. Onlar hesab edir ki, mağaza sahibi rusiyameyilli şəxsdir.
Yayılan ittihamlarla bağlı isə “Kontakt Home”dan heç bir açıqlama verilməyib.
Qeyd edək ki, bu mağazalar şəbəkəsinin sahibinin millət vəkili Elnur Allahverdiyev olduğu bildirilir.Bakupost.az
