Kanada 96 yaşlı nasisti ekstradisiya edir
Kanada kütləvi qətllərdə şübhəli bilinən 96 yaşlı nasist Helmut Oberlanderin ekstradisiya prosesinə başlayıb.
“Report” RİA “Novosti”yə istinadən xəbər verir ki, hazırda onun ekstradisiyası başlamasa da, artıq Kanada vətəndaşlığından məhrum edilib.
Ötən ilin oktyabr ayında Rusiyanın Federal Təhlükəsizlik Xidməti İkinci Dünya müharibəsində 214 uşağın qətli, həmçinin məzarların tədqiqatı və meyitlərin eksqumasiyasının nəticələri haqqında sənədləri məxfilikdən çıxarıb. Nasistlərin öldürdüyü uşaqlar Eysk şəhərindən təxliyə edilmiş uşaq evinin yetirmələri idi. Bundan sonra Rusiyada soyqırım maddəsi üzrə cinayət işi açılıb.
H.Oberlander “SS-10a” zonderkomansında tərcüməçi olaraq işləyib. Onların dəstəsi işğal edilmiş ərazilərdə qaz kameralarının tətbiqi ilə məşhur olub. Həmin əməliyyatlardan biri də 1942-1943-cü illərdə Krasnodar diyarında keçirilib. Bu ərazidə uşaqların kütləvi qətli 1942-ci ilin 9-10 oktyabr tarixlərində baş verib.
1940-cı və 1946-cı illərdə “SS-10a” zonderkomandasının bəzi üzvləri tutularaq mühakimə edilib. Ancaq H.Oberlander cinayət məsuliyyətindən yayına bilib. O, Almaniyanın təslim olmasından dərhal sonra istintaq orqanlarından gizlənib. H.Oberlander zonderkomandada xidmətini inkar etməsə də, kütləvi qətldə əli olmadığını bildirib.
2019-cu ilin dekabrında Kanadanın Ali Məhkəməsi H.Oberlanderi “SS-10a” zonderkomandasında iştirakını rəhbərlikdən gizlətdiyinə görə vətəndaşlıqdan məhrum edib. Onun verdiyi apellyasiya şikayətinə baxılmaqdan imtina edilib.
