Deputat Sona Əliyeva təhsil sərgisi biznesinə başlayır - İDDİA
Milli Məclisin ən qalmaqallı deputatlarından olan Sona Əliyeva yeni və maraqlı bir biznesə başlayır. Editor.az xəbər verir ki, deputat “Təhsilli Gələcək” İctimai Birliyinin adından Bakıda Türkiyə universitetlərinin Təhsil sərgisini keçirməyə hazırlaşır.
Sona Əliyevanın bununla bağlı artıq bir çox Türkiyə universitetlərinə müraciət etdiyi bildirilir. Qeyd edilir ki, deputat müraciətlərində Milli Məclisin ve parlamentin Elm və Təhsil Komitəsinin üzvü olduğunu və ayrı-ayrı tədbirlərdə Türkiyə dövlətinin rəsmi şəxsləri ilə çəkdirdiyi ayaqüstü şəkilləri xüsusi qabardaraq, universitetləri sərgidə iştirak etməyə təşviq etmək istəyir. Sərgidə iştirak hər universitetə iki-üç min dollara başa gələcək.
Xaricdə təhsil sərgiləri kifayət qədər ciddi gəlir gətirən sahələrdən hesab olunur. Bir sıra şirkətlərin bu sahədən çəkilməsindən sonra sərgi biznesinde ciddi boşluq hiss edilirdi. Görünür, Sona Əliyeva bu boşluğu doldurmaq və palamentdə keçirdiyi son illərdən qazancla çıxmaq üçün hərəkətə keçib. Deputatın rəhbəri olduğu deyilən “Təhsilli Gələcək” İctimai Birliyi ilə bağlı mediada hər hansı məlumata rast gəlinmir.
Sona Əliyevanın özünü isə Milli Məclisin ən qalmaqallı deputatlarından biri hesab etmək olar.Onun adı indyədək mediada bir sıra qalmaqallarda – ailəsi ilə əmlak davasında , falçı yanında “dil-ağız” bağlatdırmaq kimi qəribə olaylarda hallanıb.
