Avropa İttifaqı həbslərə görə Ərdoğanı suçladı
“Türkiyədə hərbi çevriliş cəhdindən sonra ölkədə hüquqazidd olaraq repressiyalar həyata keçirilir”. AzVision.az “RİA Novosti”yə istinadən xəbər verir ki, bunu Avropa İttifaqının genişlənmə və qonşuluq siyasəti üzrə komissarı Yohannes Han deyib.
Onun sözlərinə görə, hərbi çevrilişlə əlaqədar saxlanılan şəxslərin siyahısı qabaqcadan hazırlanıb: “Bizim qorxduğumuz bu idi. Mən və Federika Mogerini çevriliş cəhdindən sonra baş verənlərin qanunun aliliyinə dair beynəlxalq standartlara uyğun olacağını gözləyirdik. Müşahidə etdiklərimiz həmin standartlara əməl olunmadığını göstərir”.
Türkiyə hökumətinin baş verənlərdən öz maraqları naminə yararlanıb-yararlanmadığı haqda suala Y. Han belə cavab verib: “Ən azı, buna hazırlıq var idi. Siyahıların hadisələrdən sonra ortaya çıxması göstərir ki, bu məqamdan faydalanmaq üçün qabaqcadan hazırlıq görülüb”. Qeyd edək, Türkiyədə hərbi çevriliş cəhdindən sonra minlərlə hərbçi, polis, hakim, prokuror həbs edilib.
