Türk qırıcları Suriyada terrorçuları bombaladı
Türkiyə Silahlı Qüvvələri “Fərat qalxanı” əməliyyatı çərçivəsində İŞİD terror təşkilatının mövqelərinə 99, PYD (Demokratik İttifaq Partiyası) mövqelərinə isə 4 zərbə endirib. Bu barədə Trend Türkiyə Silahlı Qüvvələri Baş Qərargahının saytına istinadən məlumat verir. Azad Suriya Ordusu Tell-əl-Həvva və Salve yaşayış məntəqələri üzərində nəzarəti bərpa edib.
Bir neçə gün əvvəl aparılmış hərbi əməliyyatlar zamanı Azad Suriya Ordusunun 6 üzvü həlak olub, 18-i yaralanıb. Ümumilikdə, “Fərat qalxanı” əməliyyatı başladıqdan bəri Azad Suriya Ordusu Suriyanın 167 yaşayış məntəqəsi üzərində nəzarəti bərpa edib. Qeyd edək ki, Türkiyə Silahlı Qüvvələri avqustun 24-də koalisiya təyyarələrinin dəstəyi ilə Suriyanın Cərablus şəhərinin İŞİD silahlılarından azad edilməsi üçün əməliyyata başlayıb. Bu əməliyyat “Fərat qalxanı” adını alıb.
