Nazir ərəb şeyxlərinin Azərbaycanda ov etməsinə sevinir
Mədəniyyət və Tturizm naziri Əbülfəs Qarayev ərəb şeyxləri və onların övladlarının Azərbaycan ərazisində ov etmələrinə münasibət bildirib.
AzVision.az xəbər verir ki, jurnalistlərə açıqlama verən nazir deyib ki, Azərbaycanda bütün növ turizm inkişaf etdirilməlidir: “O cümlədən ov turizmi. Burada qanuna zidd heç bir şey görmürəm. Cəmiyyətimizə də bunun mənfi təsirinin olduğunu hesab etmirəm. Lakin bütün növ fəaliyyət dövlət qanunları çərçivəsində olmalıdır.
Ova lisenziya verilir, Ekologiya və Təbii Sərvətlər Nazirliyi tərəfindən lazımi icazələr verilir. O icazələr əsasında fəaliyyət həyata keçirilir. Bütün dünyada bu təcrübə mövcuddur. Hesab edirəm ki, imkanlı adamlar Azərbaycana gəlib, vəsaitini xərcləyirsə və bu vəsait dövriyyəyə daxil olursa, buna ancaq sevinməliyik”.
Ə. Qarayev əlavə edib ki, lisenziyalar əsasında, qanunvericilik çərçivəsində Azərbaycan mədəniyyətinə, təbiətinə, tarixi abidələrinə xələl gətirməmək şərti ilə bütün növ turizm fəaliyyəti həyata keçirilə bilər.
