Naxçıvanda poçt işçiləri üç aydır maaş almır?
GUNDEMİNFO.AZ “Gündəlik Naxçıvan”a istinadən xəbər verir ki, bura əsasən Babək və Ordubad rayonlarının poçt işçiləri daxildir.
Onların sözlərinə görə, tabe olduqları “Naxçıvanpoçt” MMC-nin rəhbərliyi bunu büdcədə pul olmaması ilə əlaqələndirir.
Şikayətçilərdən B. Bayramov deyib ki, maaş tələb etdiklərinə görə onlar işdən çıxarmaqla hədələnirlər:
“Büdcədə pul yoxdursa, necə olur ki, Naxçıvan şəhərindəki poçt işçiləri vaxtında alır, biz yox? Bəs bizim yığıb verdiyimiz pullar hara gedir ki, maaşa pul qalmır? Bizi onsuz da aşağı maaşa işlədirlər. Minimum əməkhaqqı 345 manat olsa da, bizə 310 manat verilir. Bu yaxınlarda maaşların gecikməsi ilə bağlı şikayətə getmişdik. MMC rəisi Səxavət bizi hədələyib dedi ki, bir də şikayət etsəniz, işdən qovulacaqsınız. Maaş almadan necə dolanmaq olar”.
Şikayətçilər deyib ki, rəhbərlik muxtar respublika üzrə bütün poçt işçilərinin məzuniyyət pullarını da kəsib:
“İki ildir məzuniyyət pulu da almırıq. Bayram günləri də işləməyə məcbur edirlər. Maaşa gələndə isə, deyirlər pul yoxdur”.
“Naxçıvanpoçt” MMC-dən əməkdaşların şikayətinə münasibət öyrənmək mümkün olmayıb.
