"Dünyanın ən kasıb prezidenti” 90 yaşında vəfat etdi
Yeniavaz.com xəbər verir ki, bu barədə indiki dövlət başçısı Yamandu Orsi sosial şəbəkə hesabında məlumat verib.
“Həmkarımız Pepe Muxikanın vəfatını dərin hüznlə elan edirik: “Prezident, fəal, lider... Bizə bəxş etdiyiniz hər şeyə və xalqınıza göstərdiyiniz dərin məhəbbətə görə təşəkkür edirəm”, - o yazıb.
Muxikanın ölüm səbəbi metastazlı qida borusu xərçəngi olub. 2025-ci ilin əvvəlində o, müalicədən imtina edib və vətəndaşlarla açıq şəkildə vidalaşıb. Muxika 90 illik yubileyinə bir neçə gün qalmış vəfat edib.
Qeyd edək ki, Xose Alberto Muxika Kordano 2010-2015-ci illərdə Uruqvay prezidenti olub. O, solçu baxışları ilə tanınıb və təvazökar həyat tərzi sayəsində dünya siyasətinin ən tanınan simalarından birinə çevrilib. Hətta dövlət başçısı kimi o, bağ evində yaşamağa davam edib və prezident maaşının böyük hissəsini xeyriyyə işlərinə bağışlayıb. Media Muxikanı “dünyanın ən kasıb prezidenti” adlandırıb.
