Sinəsinə döyən alimlər niyə bunu tələb etmir?! – Vikipedia məsələsi böyüyür
Bakupost.az xəbər verir ki, bunu sosial şəbəkədə Vikipediya Azərbaycanın inzibatçısı Ayxan Ziyadzadənin anası Könül Ayxan bildirib:
“Bunu anlamayan cəmiyyət küyə gedib qoşulub axına. Xalq şəhidini vikipediya üzərindən tanımamalıdır, şəhidlərimizi tanımaq məcburiyyətindəyik. ABŞ-nin saytınamı qalmısınız? Niyə sinəsinə döyən alimlər bunu tələb etmir, illərdir əziyyət çəkən, can qoyan gənci linc edir. Qaydalara əsasən ensiklopedik sayılanlar qala bilər və qalıb da. Məqalələrin yerli-dibli silinməsindən söhbət getmir, şəhid məqalələri vahid siyahılarda birləşdirilir.
Hər bir şəhidin ayrıca bir məqaləsinin olmağı həm ümumdünya ensiklopediya, həm Azərbaycandakı ensiklopediya anlayışına, həm də ümumi "Vikipediya" qaydalarına ziddir. Bu qaydalar, əsasən, Vikimedia Fondunun baş ofisinin yerləşdiyi ABŞ-də hazırlanır, bizim yox.
Gedin bir araşdırın vikipediya nədir, qaydalar nədir, ensiklopediya nə deməkdir. Sonra ittihamlar irəli sürün.
İndi Azərbaycan üzrə vikipediyanız bloklanmaq təhlükəsi ilə üzləşir. Bilin ki, sabah vikipediyanı hər hansı bir düşmənə də verə bilərlər və haqqımızda nə istəsələr yaza bilərlər. Bizə də uzaqdan seyr etmək qala bilər, müdaxilə edən olmayacaq. Bunların öhtəsindən Ayxan gəlirdi. İndi isə vikipediyanı tərk etməsini bir ana olaraq mən xahiş etmişəm. 100.000 dən çox redaktəsi, məqaləsi var idi. İndi sinəsinə döyən aliminiz gedib yazar, yaradar. Bizdən bu qədər... Təhqir və hədələrə, ölümlə hədələləndiklərinə, şər-böhtana görə də dövlətin qanunları qarşısında cavab verəcəklər”.
