Magistral yol çökdü, Şərədildə uçqun oldu
"KANAL S" (Region TV) xəbər verir ki, son 3 gün ərzində Bakı-Şamaxı-Yevlax yolunun 142-ci km-də mövcud olan sürüşmə zolaqları daha da güclənib və böyük uçqunlara yol açıb. Uçqun və torpaq sürüşməsi magistiral yolun çökməsinə səbəb olub. Sürüşmə ərazisi gündən-günə genişlənir.
Sürüşmə ərazisinin uzunluğu təqribən 40-45 metr, çatların dərinliyi 30-40, hətta bəzi yerlərdə 60 sm-ə çatır. Ağsudan-Şamaxı və əks istiqamətdə hərəkət edən sürücülər çətin anlar yaşayıblar. Sürüşmə ərazilərinin daha çox qeydə alındığı Bakı-Şamaxı-Yevlax yolunun Ağsu dolaylarından keçən hissəsində yük avtomobillərinin hərəkəti qadağan olunsa da buna tam olaraq əməl olunmur.
Yolun Şərədil kəndi yaxınlığındaki ərazilərində uçqun müşahidə olunub. Yolun uçquna məruz qalmış ərazisi işarələnərək bir hissədə hərəkət məhdudlaşdırılıb.
Azeryolservis ASC-dən verilən məlumatda yaxın günlərdə sözügedən ərazidə işlərə başlanılacağı bildirilib.
