Sarkisyanın qardaşı dələduzluqda ittiham olunur
Bir neçə gün əvvəl Gümrü (Ermənistan) Şəhər Şurasının konfransında prezident Serj Sarkisyanın qardaşı Levon Sarkisyana şəhərin “fəxri vətəndaşı” adının verilməsi barədə qərar qəbul olunub. Virtualaz.org bildirir ki, həmin qərarın əleyhinə yalnız bir nəfər- müxalif "Asparez" jurnalistlər klubunun sədri Levon Barseqyan səs verib.
Dövlət başçısının kiçik qardaşına belə bir adın verilməsi Gümrü sakinlərinin xoşuma gəlməyib və narazılığa səbəb olub. Təkcə son vaxtlar hərəkətləri hamıda qıcıq doğuran prezidentin qardaşı olduğuna görə yox, həm də ona görə ki, uzun müddət ərzində o özü də pis ad çıxarıb.
Məsələ ondadır ki, Levon Sarkisyanın təsisçisi olduğu xeyriyyə təşkilatlarından, xüsusilə də "Pyunik"dən mütəmadi olaraq diasporun böyük maliyyə ianələri “yoxa çıxır”. Halbuki xarici havadarlar həmin vəsaiti konkret olaraq 1988-ci ildə baş verən dağıdıcı Spitak zəlzələsini qurbanları üçün ayırmışdılar.
İndi vətəndaş təşəbbüsü qrupu kimi tanınan "Qala" adlı təşkilat Gümrü sakinləri arasında Levon Sarkisyanın həmin titulunun ləğv oluması üçün imza toplayır. Təşkilatçıların sözlərinə görə, iki gün ərzində petisiyanı artıq iki min nəfər imzalayıb. Yeri gəlmişkən, bu, prezidentin qardaşına verilən ad və mükafatlarla bağlı ilk qalmaqal deyil. Bu ilin martında, Serj Sarkisyan açıq etirazlara məhəl qoymayaraq, öz qardaşını Ermənistanın ali mükafatlarından olan "Vətən qarşısında xidmətlərinə görə” 1-ci dərəcəli ordeni ilə təltif etdi. Bu çox böyük qalmaqala və narazılığa səbəb olsa da, məmurlardan heç biri jurnalistlərə Levon Sarkisyanın Ermənistan qarşısında hansı xidmətlərinin olmasına dair heç olmasa bircə misal belə göstərə bilmədi.
